Ayaw kalimti si Kristo sentro sa Pasko: Palma
Taliwa sa wala ug tuo nga mga Christmas party, si Cebu Archbishop Jose Palma nagpahinumdom sa katawhan sa tinuod nga kahulogan sa Pasko.
Ang arsobispo maoy nangu sa pagbukas sa siyam ka adlaw nga Misa de Gallo sa bagong gitukod nga simbahan, ang San Isidro Labrador Parish sa Barangay Garing, lungsod sa Consolacion.
Sa iyang wali, si Palma nipasabot sa kamahinungdanon sa Misa de Gallo nga mao ang pagpangandam sa pag-abot ug pagkatawo ni Hesukristo sa kalibotan.
“Mao kini ang tinuod nga Aguinaldo. Nine days nangandam kita sa birthday ni Kristo. Kining pagpangandam di kita malimot sa pag-abot ni Kristo,” sumala sa arsobispo.
Matod niya dili angay kalimtan sa mga tawo nga bisan sa daghang mga Christmas party, ang sentro sa kasaulogan mao ang pagkatawo sa Ginuo ug angay kini nga padayunon sa matag pamilya sa panimalay.
Siya nisaysay tungod kay walay nidawat nila ni Jose ug Maria, si Hesus natawo sa pasungan.
“Kon way nag-welcome niya, unta welcome siya sa atong kasingkasing, unta welcome siya sa atong panimalay. Akong punto, Lord welcome ikaw sa akong kasingkasing ug sa akong pamilya,” dugang ni Palma.
Siya nidugang nga bisag gamay nga imahe sa Señor Santo Niño ibutang sa altar aron magpahinumdom sa gugma sa Ginuo sa mga tawo.
Si Palma nisaulog sa misa kauban sila si Padre Alex Cola, parish priest sa San Isidro Labrador Parish, ug Padre Japeth Geonzon, secretary sa arsobispo.
Siya nalipay sa bag-ong simbahan nga gipabarog sa Consolacion nga bisan wala pa mahuman og tukod, nidagsa ang mga tawo sa unang adlaw sa Misa de Gallo.
Si Padre Cola mapasalamaton ni Palma nga bisan og dunay bagyong Urduja niadto sa ilang dapit.
Matod niya bisan og piso way nabayran ang parokya sa pagpalit sa yuta ug pagpatag niini nga nahimutang sa bukirang bahin sa Barangay Garing.
Siya nibutyag nga usa ka architect ug engineer nga taga Quezon Province ug tua na nagpuyo sa Germany ang nipalit sa yuta og dul-an P1 milyon ug naimpas og bayad sud sa 26 ka adlaw.
“Mao na nakaingon ko ang Ginoo buhi gyud kaayo,” pahayag ni Cola.
Nilungtad og siyam ka buwan ang paghawan ug pag-ugmad sa yuta sa lugar tungod sa kabukid sa nahimutangan niini.
Wa usab sila gipabayad sa pag-develop sa yuta.
Si Cola nidugang ang David Justin Heavy Equipment Corp., ang libre nagpagamit sa crane ug pison alang sa pagbutang og mga haligi ug trusses sa simbahan nga gisugdan og tukod niadtong Hunyo 3 ning tuiga.
Aron mahuman ang katukoran sa simbahan, nagpatabang sila sa ubang mga parokya pinaagi sa second collection labi na sa P3.7 milyones nga gisugyot nga altar retablo.
Si Consolacion Mayor Teresa Alegado nitabang usab sa fundraising alang sa proyekto. /