Mga karne hugot gibantayan sa PVO
Gimando sa Provincial Veterinary Office (PVO) ang paghingusog sa pagpatuman sa mga lagda alang sa pagbaligya og luwas nga karne sa kamerkadohan sa probinsiya, ilabi na niining Christmas season.
Dunay mga tinugyanan sa PVO nga niabag karon sa National Meat Inspection Service (NMIS) sa ilang pagsubay sa mga merkado ug bisan sa mga mall sa ilang pagsunod sa insaktong proseso sa meat handling.
Tungod sa holiday season, taas ang demand sa karne karon sa kamerkadohan.
Matod ni Provincial Veterinarian Doctor Mary Rose Vincoy, dili problema sa Sugbo ang double dead nga mga karne tungod sa daghang local supply niini.
Dugang niya, nag-unang suliran dinhi ang mishandling sa karne ug ang uban walay meat inspection certificate.
Sigun ni Vincoy, kinahanglang sutaon una sa mga konsumidor kon limpyo ug luwas ang karne nga paliton pinaagi sa pagpangita sa tatak nga magmatuod nga nipaubos kini sa insaktong meat inspection gikan sa pag-ihaw hangtud sa pagdala sa merkado.
Ang mga masakpan nga mag- display ug mishandled o kaha wala mainspeksiyon nga karne, mag-atubang og administrative sanction gikan sa NMIS.
Gipahibalo ni Vincoy nga na-establisar na isip bag-ong dibisyon sa iyang opisina ang Provincial Meat Inspection Service (PMIS), diin ubos sa hurisdiksiyon niini ang tanang merkado, mall, meat shop, poultry dressing plants ug ihawan sa probinsiya.
Matod ni Vincoy, sama sa NMIS, ang ilang trained personnel na ang modakop sa mga malapason sa mga meat inspection guidelines.