Sa Kongreso ang bugno

Samtang dalaygon ang gibuhat ni Cebu City Mayor Tomas Osmeña sa iyang pagpanalipod sa Angkas nga iya pang giadtoan sa Manila, ang iyang pagpangugat mahimong makawang lang kon wa kini suporta sa mga magbabalaud. Mas lisod madunggan ang iyang singgit kon siya nag-inusara lang. Tingali, dako ang purohan nga siya paminawon kon maghiusa silanga mga mayor pag-pressure sa mga magbabalaud sa pagpanday og balaud nga mag-legal sa habalhabal.

Dunay balaudnon si Kongresista Raul del Mar alang ning mao nga katuyoan. Pinaagi sa balaudnon, kon uyonan, mahimong ilhon nga legal nga matang sa pampublikong transportasyon ang habalhabal.

Sukad nauso ang habalhabal sugod niadtong tunga-tunga sa dekada 90 kun kapin na sa duha ka mga dekada, nagpabiling ilegal ang operasyon niini.

Apan tungod kay mao ra kini ang madaling kasakyan sa mga lumolupyo sa kabukiran ug ubang hilit nga mga dapit, kini gipiyungan sa mga awtoridad ug lokal nga mga kagamhanan.

Mao ra ni ang ilegal nga transportasyon nga gipasagdan ug wa ilha kagamhanan bisan sa kadugay na.

Daghan ang kaayuhan nga makuha kon himuon nang legal ang habalhabal.

Una, mahimong ma-regulate ang ilang gidaghanon kay makontrol kini sa lokal nga kagamhanan pinaagi sa usa ka ordinansa nga mao say gigamit sa operasyon sa mga traysikol.

Ikaduha, di na si bisan kinsa ang maka-drive og habalhabal, lahi karon nga bisan mga bata pa mahimo nang makapamasahero. Kadto lang dunay lisensya ang makamaneho ug ang makapaangkas kadto lang dunay prangkisa.

Ikatulo, sayon na lang ang pag-ila sa mga badlungon nga mamasahero.

Busa, ang gibuhat unta ni Osmeña mao ang pag-lobby sa Kongreso, di ang pag-igo sa Land Transportation and Franchising Regulatory Board (LTFRB) nga tigpatuman ra sa balaud.