Senyor Santo Niño Bridge
Mahimong sentro ang umaabot nga Cebu- C o rdova Link Expressway kun CCLEX sa mga talan-awon karong umaabot kasaulogan sa ika-5 nga sentenyal sa pagabot ni Ferdinand Magellan dinhi sa Sugbo dala ang imahen ni Senyor Santo Niño.
Kahinumdoman, si Magellan niabot sa Sugbo sa tuig 1521. Ika-500 ka tuig o ika-5 ka sentenyal sukad niining maong kalibotanong hitabo karong umaabot 2021.
Mahinungdanon alang sa tibuok kalibotan kini kay si Magellan maoy nakapapruweba nga lingin diay ang kalibotan.
Niadtong tungora, gituohan nga dili lingin ang kalibotan. Usa lang kini ka dakong patag ug mahagbong ka inig abot sa labing daplin niini. Apan napakita ni Magellan nga pinaagi sa paglawig ngadto sa kasadpan, moabot ka sa sidlakan kay lingin man gyud tinuod ang kalibotan.
Ang 1521 dakong tuig alang sa kasaysayan sa kalibotan ug ang 2021 mao ang ika-500 nga tuig sukad niini.
Dugang niini, nagsugod sa 1521 ang pagturok sa Kristiyanismo sa South East Asia. Ang Sugbo ug ang imahen ni Senyor Santo Niño nahimong sentro sa maong tinuig nga kasaulogan nga nailhan nato karon nga Sinulog Festival.
Mao nga tayming kaayo nga karong 2021, humanon ang Cebu-Cordova Link Expressway nga nganlan og Senyor Santo Niño bridge.
Matod pa ni Secretary Adelino Sitoy, mahimong sentro nga talan-awon ang maong taytayan nga magsumpay na sa lungsod sa Cordova ug sa Syudad sa Sugbo.
Didto kini gipamulong ni Sec. Sitoy sa awarding sa kontrata alang sa pag-design ug pagtukod sa maong taytayan ngadto sa tulo ka mga contractor lakip ang usa ka kompanya nga gikan sa Espanya.
Sulod sa dugay nga panahon, daw nasuok ang lungsod sa Cordova. Apan kining maong taytayan mahimo nang usa ka ganghaan nga agi-an sa mga bisita sa Syudad sa Sugbo.
Malipayon sab si Mayor Tomas Osmeña kay ang taytayan molandig sa South Road Properties nga iyang higanteng proyekto. Buot ipasabot, gikan sa Mactan-Cebu International Airport (MCIA), mahimo nang modiretso sa SRP ang atong mga bisita ug investors.
Karon, ako lang isumpay nga dihang naabot si Magellan sa Sugbo kaniadto, usa na kini ka mahinungdanong trading port dinhi sa South East ug sa China. Ang pag-abot ni Magellan nakasumpay sa Sugbo ngadto sa ekonomiya sa Uropa.
Nahimo sab kining ganghaan alang sa mga taga Kasadpan kun West aron makig-negusyo sa Layong Sidlakan ug sa China.
Makahuloganon nga sa tulo ka mga contractor, usa niini kay korporasyon nga Katsila nga magtinabangay sa duha ka lumad nga kompanya. Mahimong simbolo kini nga ang Sugbo tinuod nga dapit diin mag-abot ang West ug East dili lang tungod sa relihiyon ug kasaysayan, lakip na sab ang ekonomiya.