Kahimtang sa dan

Ang akong lindog nagtuki sa mga isyu sa kahimtang sa trapiko ug atoang kadalanan. Sa matang sa mga driver nato, lisod nga daygon tungod kay mapribado man o publiko, daghan ang mga salawayon. Di usab tanan kay daghan usab ang maayo. Mailhan nimo ang maayo ug mga salawayon pinaagi sa ilang pagpadagan sa sakyanan.

Sukad ko nagbiseklita, akong nakit-an ang kadaghan sa mga badlungon sa dalan, apil na sab ang ubang mga siklista, labina kanilang anha mangagi sa mga sidewalk. Usahay apil na sab ko ani.

Bitaw, kon kitang tanan magbaton og disiplina sa kaugalingon, di tingali mograbe og maayo ang kahimtang sa atoang trapiko. Apan unsaon nga ang atoang kahakog sa kaugalingon mohari bisan diha sa karsada.

Niadto lang Huwebes sa gabii, dihang padung ko magkuha sa akong asawa sa GMA 7 sa Nivel Hills sa Brgy. Apas, ang trapiko sa mga eskina General Maxilom avenue ug dan Echavez wa moirog. Way gustong mohatag og dan aron kalutsan sa uban. Nahitabo ni kay wa mo-function ang traffic light niadtong higayuna.

Diha na nabadbad ang naghuot nga mga sakyanan human mangabot ang mga traffic enforcer nga natayming ra usab. Kon wa pay enforcers nga nakaagi, mokanit ang mao nga suliran sa duol nga kadalanan.

Problema

Kapila na ko makaagi og samang problema. Dihay makausa sa eskina sa dan Escario ug Gorordo avenue, taas na kaayo ang linya sa mga sakyanan sa nagasanga nga mga dan. Langas na kaayo ang mga busina. Way gustong mohawa sa ilang lugar.

Kaming mga nagmotorsiklo ug nag-scooter, nakalusot ra. Unya, ang portion sa Gorordo avenue padung sa downtown, pwerteng hawana. Kon ang usag usa nihatag pa og daan, di unta gihapon maingon niadto ang kahimtang sa mga sakyanan.

Kining suliran sa trapiko usahay mosangko sa lalis. Ang amo nga usa ka silingan, kon akong basehan ang estorya, gipusil patay siya tungod sa lalis sa trapiko. Usa ka kinabuhi sa buotan nga amahan ang nakalas tungod sa way puangod nga motorista. Di ko makatugkad sa ka mananap sa usa ka tawo nga mopatay lang tungod sa lalis sa trapiko.

Lungag

Gawas sa trapiko, ang laing suliran mao ang bati kaayong kahimtang sa atoang kadalanan. Daghang libaong nga di ordinaryo, gawas nga lapad, pwerte pang lawma. Kini nga mga libaong mao ang makadaot og dali sa mga ligid ug ubang parte sa mga sakyanan ug aksidente.

Ang nakapait, wa ni tagda sa Cebu City Hall. Pero tanawa unya pipila ka mga buwan sa di pa ang eleksyon, bahaan nig aspalto ang mga karsada. Unya ang kinabagsa mga botante, dali ra kaayong ma-amnesia.