Mga Santa Klaus

Basta Pasko may mga Santa Klaus sa among sityo sa Kalubihan. Magtapok sila sa usa ka barungbarong, mag-inom, magkinan-anay, mangahubog ug may mangligdas sa yuta. Nagkamuritsing ang ilang mga nawong sa kinaon nilang mga karne. Nagpasad ang mga bukog ug ang mga iro nagpista pag-ub-ob niini. Mohagok sila bisag nagsulbong ang mga lamok.

“Meri krismas! Meri krismas!” mao kini ang kabanha nga mabati gikan kanila. Sa sayong gabii pa nang-apod-apod sila og pinaskuhan sa kasilinganan. Ug nagmalipayon kaming mga makililimos, mga buta, mga pungkol ug mga bakol, kay nabuhong kami sa ilang mga gasa sama sa pansit kanton espagheti, litson manok, tsapsoy, kinilawng mga isda, sopdrinks, tsokoleyt, kendi ug uban pa.

“Di na diay ka si Robinhod?” sukot ko kang Isyot-bunguton samtang nag-ub-ob kog karne bisan pangag ko.

Mikagiki siyag katawa kanako. “Pasko ron, Emyat, mao nga mga Santa Klaus ron mi!”

Nakapanglingo ko. “Delikado ka niana. Di ka makadagan kay dakog tiyan si Santa Klaus, apan wa kay pana sama kang Robinhod.”

Nakabati ang ubang mga Santa Klaus. Mibahakhak sila ug nagdinagpiay sa ilang dagkong mga bukton ug mga abaga.

Apan pagka buntag sayo wala sila makadagan. Gipukaw sila sa mga pulis, gipangsikop, gipusasan.

Ug nianang pagka hapon gipamunit kami sa mga kapunungan nga pribado ug publiko. Gani, may mga madre nga mibitbit kanako ngadto sa ilang pinuyanan. Wala pa ko makasabot niadtong higayuna.

Kapin na sa kawhaan ka tuig ang milabay. Karon nakita ko ang akong kaugalingon nga nagsul-ob nag sapot sama sa mga madre.

Takulahaw lang mitunga ang mga Santa Klaus sa usa ka sityo sa eskuwater nga dapit sa dakbayan. May mga putos ug mga kahon silang gipangapod-apod sa kabataan ug katiguwangan. Nakahilak kong nagsud-ong kanilang tanan.

“Meri krismas! Meri krismas! Meri krismas!” Misibaw ang tinuod nga Pasko sa ilang dapit, sanglit miabot ang mga Santa Klaus gikan sa estasyunan sa kapulisan.