PINASKOHAN SA FRAT MEN
Lainlain og mga pamaagi ang mga fraternity ug sorority sa pagsaulog sa ilang anibersaryo. Dunay magpahigayon og feeding program, tree planting, gift giving ug ubang mga buhat paghatag og kalipay sa ubang mga tawo agi og pasalamat sa paglahutay sa grupo sa taas nga katuigan. Usa na niini ang Tau Omega Phi kun Topans Society nga nagsaulog sa iyang ika-35 nga founding anniversary niadtong Oktubre 15, 2017.
Sa dili pa mahuman ang Disyembre, ang mga miyembro sa Topans mopaambit sa mga gasa nga ilang nadawat pinaagi sa paghatag og pagkaon sa mga lolo ug lola sa Hospicio de San Jose, Barangay Guibuangan, lungsod sa Barili, habagatang Sugbo o sa mga bata sa day care
center sa samang barangay. Magsilbi kini nila nga Pinaskohan sa uban.
Sa summer sa sunod tuig, mag- tree planting usab sila sa Barangay San Rafael sa samang lungsod.
Gawas sa community works, magbutang usab sila og wall clock may logo sa ilang grupo sa plaza sa Brgy. Guibuangan. Ang Topans natukod niadtong Oktubre 15, 1982 pinaagi ni Crisencio Diaz uban sa
co-founders nga sila si Manuel Jumaya, Reuben Velasquez, Victor Opeña, Nieto Alania ug Candelario Bustamante.
Si Jeffrey Cui, kanhi presidente sa national council gikan sa 2014 hangtod sa 2017 ug karon
adviser sa Topans, nisaysay nga naporma ang grupo dihang nabuwag ang mga co-founder sa ilang mga kanhi fraternity gumikan sa mga lagda nga gisupak sa ilang mga kauban.
Ang grupo unang natukod sa kanhi Cebu Central Colleges (CCC) nga karon University of Cebu (UC) inabagan ni Atty. George Bragat.
Sa kasamtangan, matod ni Cui, aduna sila’y 50 ka aktibo nga mga miyembro nga naa sa lainlaing mga lugar sama sa mga lungsod sa Barili, Daanbantayan, Medellin, San Francisco, Cebu; ug Merida sa Leyte ingon man sa mga siyudad sa Sugbo ug Danao, Cebu; Cagayan de Oro; San Carlos, Negros Occidental; ug Ormoc, Leyte.
Aduna usab sila’y mga miyembro nga atua na manarbaho sa San Francisco, California, USA; Dubai, United Arab Emirates ug ubang bahin sa Middle East; New Zealand; Canada; England; ug Ireland.
Ang mga miyembro sa Topans nga nagbase sa Cagayan de Oro City, nisaulog sa ilang anibersaryo pinaagi sa pagtabang paglimpyo sa mga sam-ang sa siyudad, pagpintal sa mga bungbong nga gitagana alang sa mga
fraternity ug uban pa. Ang grupo ubos sa pagtambag nila ni Dr. Joseph Elvir Tubilan, professor sa Cebu Normal University (CNU) ug Dr. Alfredo Acuña, professor sa UC.
Tinguha sa Topans Society ang pagpalambo sa kalinaw, kahiusahan ug kaangayan sa katawhan.
Si Cui nidugang ang matag miyembro kinahanglan nga patas sa pagtabang ug pagtagad sa mga tawo. /