2017 PBA SUGDAN
Sugdan karong hapon ang Philippine Basketball Association (PBA) 43rd season sa Araneta Coliseum.
Moabot sa 21 ka rookies nga gipangulohan ni Keifer Ravena ang mokuyog sa ilang tagsatagsa ka team sa tradisyunal nga parada sa opening rites.
Si Ravena, kinsa produkto sa Ateneo Blue Eagles, sakop sa NLEX Road Warriors nga nagpili kaniya isip No.2 overall pick sunod ni Fil-German Christian Standhardinger, kinsa gitudlo sa San Miguel Beermen isip No.1 overall pick.
Nakatakda untang mag-krus dayon ang dalan nila ni Ravena ug Standhardinger gumikan kay magharong man ang Beermen ug Road Warriors sa nag-inusarang duwa human sa opening program.
Apan dili kini mahitabo gumikan kay nagtiwas pa si Standhardinger sa iyang obligasyon sa Hong Kong sa Asean Basketball League (ABL).
Lakip sa dekalidad nga rookies sa 43rd season mao sila si Raymar Jose sa Blackwater Elite, Jason Perkins sa Phoenix Fuel Masters, ug Jeron Teng sa Alaska Aces.
Ang GlobalPort Batang Pier maoy adunay labing daghang rookies. Kini mao sila si Julian Sargent, Michael Vincent Juico, Lervyn Flores ug Joseph Angelo Gabayni.
Ang Blackwater, Kia Picanto ug Talk N' Text KaTropa naa'y tulo ka rookies matag usa.
Sila si Jose, Emil Renz Palma ug Kyle Drexler Neypes ang mga bag-o sa Blackwater, Jonjon Gabriel, Jan Jamon ug Roldan Sara sa Kia ug Mark Tallo, Monbert Arong ug Sydney Onwubere sa Talk N' Text.
Ang ubang mga bag-o mao sila si Jett Manuel sa Barangay Ginebra Gin Kings, Jam Cortez sa Phoenix, Robert Herndon sa Magnolia Hotshots, Rey Nambatac sa Rain or Shine Elasto Painters ug Louie Vigil sa San Miguel.
Ang Beermen gilaumang mopatigbabaw batok sa Road Warriors sa labing unang duwa sa 2017-18 season nga sugdan pinaagi sa Philippine Cup.