OKC MIDUGDOG HUMAN SA 3 O.T.
Nagkinahanglan pa og tulo ka mga overtime ang Oklahoma City Thunder una nila nabuntog ang host Philadelphia 76ers, 119-117, kagahapon sa National Basketball Association (NBA).
Gipangulohan sa kasamtangang MVP nga si Russell Westbrook ang kadaugan pinaagi sa iyang triple-double nga 27 puntos, 17 rebounds ug 15 assists
samtang ang 76ers gipangulohan ni Joel Embiid.
Sa krusyal nga bahin, nagtinubagay sila si Westbrook ug Embiid pagmugna og puntos ug paggiya sa ilang tagsatagsa ka puwersa hangtod na sa katapusang gutlo.
Gumikan sa ka kulbahinam sa duwa, gikonsiderar kini nga lig-ong kandidato alang sa NBA game of the year. Pagkahuman sa duwa, misenyas og goodbye si Westbrook ngadto kang Embiid unya dala nga pahiyom. “I was telling him, `Go home,” matod ni Westbrook.
Sa sayo pa, napungot nang daan si Westbrook kang Embiid dihang misenyas og goodbye ang social media star sa 76ers dihang na- foul out ang pambatong sentro sa Thunder nga si Steven Adams.
Gawas niini, napalakan sab ni Embiid si Westbrook nga maoy nakaluwas sa 76ers nga himatyong segundos sa unang overtime.
Mibuhi sab og mahait nga mga pulong si Embiid ngadto sa laing pambato sa Thunder nga si Carmelo Anthony.
Apan ang katapusang katawa naangkon ra gihapon ni Westbrook. “I’m not about to get in a backand-forth with him,” matod ni Westbrook kabahin kang Embiid. “I’m not about to give him my energy.”
Dili maayo ang field goal ni Westbrook diin igo lang siyang nakatali og 10-of-33 apan sa panahon nga gikinahanglan, gibuhat niya tanan nga iyang mga makaya lakip na ang assists ngadto kang Andre Roberson alang sa nagpadaog nga puntos sa ikatulong overtime.
“Just trusting it,” batbat ni Westbrook.
Si Embiid adunay gipamating sakit sa iyang likod dihang milusot kini sa 4th quarter. Tataw nga human niini, magping-it si Embiid matag timeout apan gikaya ra niini ang tanan.
Gipasabot ni Embiid nga nagkinahanglan lang siyang magpatambal ug wala sab niya gipanumbaling ang komentaryo ni Westbrook nga paulion siya niini.
“They did a lot of things. But, I mean, the dude shot 10 for 33. I wish I would had shot 33 times. I guess we would have had a better chance of actually winning the game,” matod ni Embiid.
“But he told me to go home. This is my home. I ain’t going nowhere.”
Nihatag og dakong suporta kang Westbrook mao ang sama niyang All-Stars nga sila si Anthony ug Paul George, kinsa ningmugna og 24 puntos matag usa.
Si JJ Reddick nidugang og 19 puntos alang sa 76ers samtang niamot og 16 puntos si Dario Saric.
Sa laing mga duwa, ningdaog ang Detriot Pistons batok Indiana Pacers, 104-98, Miami Heat batok Charlotte Hornets, 104-98, Portland TrailBlazers batok Orlando Magic, Washington Wizards batok LA Clippers, 100-91.
Ninglampos sab ang Toronto Raptors batok Brooklyn Nets, 120-87, Utah Jazz batok Boston Celtics, 107-95, Chicago Bulls batok Milwaukee Bucks, 115-109, Memphis Grizzlies batok Atlanta Hawks, 96-94, Denvert Nuggets batok New Orleans Pelicans, 117-111 (OT) ug Houston Rockets batok San Antonio Spurs, 124-109.