‘HULIDAP’ SA MGA PULIS?

GISIKOP BISAN GIINGONG WAY SHABU; HEPE SA CORDOVA NANALIPOD SA 4 KA SAKOP

Upat ka mga pulis sa lungsod sa Cordova gipasanginlan nga illegal nga ningsikop sa usa ka gituohan nga tigamitan sa illegal nga drugas nga way warrant of arrest bisan kon giingong way nakuha nga drugas gikan kaniya.

Apan ang hepe sa kapulisan sa mao nga lungsod nanalipod sa iyang mga sakop, niingon nga nakuhaan og illegal drugs ang suspek.

Usa sa mga lumolupyo sa Purok 2, Barangay Gabi, lungsod sa Cordova nitug-an sa Superbalita Cebu ug dyHP RMN Cebu nga kalit lang nangabot ang mga pulis ug gidiretso og posas si Elder Anoza, 36, trabahante sa usa ka establisemento sa lungsod.

Natingala sila nga sa pag-abot sa police station, duna nay usa ka pakete sa illegal drugs nga matod pa nakuha gikan sa iyang bulsa atol sa pagrekisa.

“Gidiretso ra man nila og dakop si Elder, Sir. Nya gipusasan, dayon gidala nila sa ilang police station,” pasangil ni Rudy, silingan sa dinakpan.

Apan hugot ning gihimakak sa hepe sa Cordova police station, Chief Insp. Clemente Ceralde, sanglit nakuhaan nila og drugas si Anoza.

Gipasabot ni Ceralde nga una nilang nasikop sa Barangay Alegria ang usa ka gikatahapang drug pusher nga si Hilario Marangga, kinsa nakuhaan og illegal nga drugas.

Sa dihang ilang gisubay ang cellular phone, ilang nakita ang binayloay nga mensahe ni Anoza nga ni- order og drugas.

Niadtong miaging hapon, nakadawat og tawag sa telepono ang police station nga dunay kagubot sa Barangay Gabi.

Sa ilang pag abot, si Anoza ang nalambigit niini.

Ila kining girekisa sa pagsiguro nga way dala nga armas, apan nakuhaan na hinuon og usa ka pakete sa illegal nga drugas.

“May transaction siya sa cellphone. Nandyan sa inbox niya at sa sent items. Di ko alam kung naka order na sya basta ang punto duon nag order sya ng shabu,” matod ni Ceralde.

Ang hitabo gi post sa Facebook sa mga higala sa pagumangkon sa dinakpan nga nabasahan usab sa mga opisyal sa Camp Crame.

Tungod niini, ang Police Regional Office 7 nimando og imbestigasyon kon duna bay nalapas sa police operational procedure ang tulo ka mga pulis nga gipasanginlan.

Usa sa mga kabanay ni Anoza niangkon sa Superbalita Cebu nga tigamitan sa illegal nga drugas ang dinakpan apan giingong niundang na.

Andam hinuon nga atubangon sa hepe sa Cordova police station ang imbestigasyon nga himuon sa PRO 7 ug ilang gibarugan nga wa silay nalapas nga operational procedure sa PNP.