3K kapin nga vials sa Dengvaxia giuli

Liboan na ka mga anti-dengue vaccine nga Dengvaxia ang nabawi sa Department of Health 7 (DOH) gikan sa pipila ka mga baranggay.

Si Dr. Alma Corpin, OICCebu City Health Department, nagkanayon nga naghuwat pa sila sa mando gikan sa DOH sa mga plano mahitungod sa Dengvaxia.

“We are just waiting for the guidelines from the DOH, what we do here is just to implement,” matod ni Corpin. Padayun nga pag-monitor ug pag-alima sa mga bata nga nabakunahan ang ilang gihatagan og importansya sapagka karon.

Gitataw sab niya nga ang pagpangusog sa kampanya batok sa dengue ang mas labing gihatagan og tumong sa ilahang departamento.

"Preventive man jud ang amoang side,” dugang ni Corpin.

Aduna nay labaw sa 3,741 ka mga garapa sa mga vaccine ang nabalik ngadto sa DOH duha na ka semana ang milabay apan wala pa sila’y nadawat nga mga plano mahitungod niini.

Si DOH 7 director Jaime Bernadas nagkanayon nga kaniadto nga nakadawat siya og mando gikan ni Health Secretary Francisco Duque nga isuspenso ang paghatag og mga anti-dengue vaccine nga Dengvaxia ug bawion kini sa labing madali.

Nagkanayon si Bernadas nga ang tanan nga mga bakuna batok sa dengue mahimong ipadala ngadto sa DOH Central Office sa Manila.

Kini tungod nakadawat sila og daghan nga mga taho nga daghang mga bata ang grabeng na-dengue human sa pagbakuna.

Labing menos sa 159, 766 ka mga bata ang nakadawat sa unang doses sa Dengvaxia sa Cebu.

Giawhag sab niya ang publiko sa paglimpyo kanunay sa ilang palibot aron malikayan ang pagdaghan sa mga lamok nga posibleng makadala og sakit nga dengue kay ang tinuod nga solusyon sa maong sakit mao ang kalimpyo ug kooperasyon sa katawhan.