911 SYSTEM GAMITON SA CEBU
Usa ka numero isip emergency hotline.
Mao na unya ni ang gamiton sa matag Sugbuanon sa dakbayan sa Sugbo kon hingpit na nga mapatuman ang 911 system sunod tuig.
Kagahapon, gipresentar sa PLDT ngadto kang Cebu City Mayor Tomas Osmeña ang systema sa 911 aron magamit kini isip sentralisado na nga emergency number.
Ang 911 system mohatag sa mga serbisyo sama sa ambulansiya, Bureau of Fire Protection, Emergency Rescue Unit Foundation ug uban pa.
Usa sa gipresentar sa mga opisyales sa PLDT ang Smart SOS Dispatch, diin usa kini ka digital emergency response mechanism nga maseguro ang kaepektibo sa sistema. Matod ni Michael Eparwa, Digital Engagement Solutions Expert, nga usa kini ka public safety emergency response system nga nagdagan sa cloud ug interconnected sa 911-DILG system. Ang mahitabo kon ang caller motawag 911 usa kini ka dispatch system nga makita sa command center ug mahibaw-an kon asa ang mga responder pinaagi sa GPS tracking ug mahibaw-an kon pila ka minutos maabot ang responders ngadto sa tawo nga mi-report sa insidente sa 911.
Nasayran nga ang 911 gipatuman na usab sa ubang lugar sama sa Ilocos, Puerto Princesa, Cavite, La Union ug daghang local government units ang mikuha sa ilang serbisyo.
Di mominus 45 ka mga Smart SOS Dispatch service units ang gamiton sa sistema ug laing 70 ka mga CCTV cameras ang itaod sa siyudad.
Nasuta nga ang City government mogasto og P15 milyon alang sa operasyon niini sunod tuig sanglit naa naman kini sa annual budget alang sa 2018 ubos sa disaster funds.
Ang pangulo sa Cebu City Disaster Risk Reduction Management Office Nagiel Bañacia miingon nga usa sa matabang sa sistema mao nga sayon nalang sa publiko ang pag- report og mga insidente apan giklaro niini nga limitado lang kini sa Cebu City ug kon aduna silay madawat nga report gikan sa ubang siyudad ilaha kining i-refer.
Dugang ni Bañacia nga ang gibayran sa siyudad mao ang sistema samtang ang mga responder gikan sa City hall nga ipaubos sa pagbansay-bansay aron motubag og mga emerhensiya.
Gibutyag usab ni Osmeña nga itandi sa kasamatgan nga CCTVs sa Sugbo matod pa mas advantage kini sa siyudad tungod kay di na magproblema pa ang city government sa pag-mintenar niini tungod kay ang PLDT naman ang mohimo niini.