Bugnong lugaynon
Daghan ang gibati og kalisang sa dihang miigo si Urduja sa Tacloban kaniadtong miaging semana. Dili man siya kusog kaayo sama sa ubang mga bagyo nga mibisita sa Tacloban apan dunay lain nga epekto si Urduja, matod pa sa usa ka residente didto. Dunay nagtaghoy dala sa uros sa hangin, dugang pa niya. Lain kaayong paminawon kay makahadlok ang maong tingog; kon mokusog ang hangin, mokusog usab ang nagtaghoy nga tingog. Mohinay sab ang taghoy kon mohinay ang hangin, matod pa.
Kusog ang ulan nga way hunong, sud sa pipila ka adlaw, matod pa sa nagbalita. Tungod niini, dali ra kaayo nga mibaha ang lainlaing lugar sa Southern Leyte, apil ang mga probinsiya sa Samar ug Biliran. Sa kanunay nga pagtulo sa ulan, nahumok ang yuta og mao kini hinungdan nga nahugno ang pipila ka mga taytayan, apil na ang pipila ka mga kalsada. 41 ka mga tawo ang gitahong namatay sa paghapak ni Urduja.
Mibisita si Presidente Digong Duterte sa Naval, Biliran kaniadtong Lunes, dala ang pipila ka mga sakop sa iyang kabinete. Atubangan sa mga opisyales, katawhan og mga sakop sa media, gipasalig ni Duterte ang tabang gikan sa gobiyerno sa mga biktima sa bagyo. Gipasalig sab ni Duterte ang pag-ayo sa mga naguba nga taytayan og mga karsada, apil ang paghatag sa ayoda sa mga biktima sa bagyo.
Interesado si kanhi mayor sa Carmen nga si Che Toribio delos Reyes nga mobalik pagkandidato isip kongresista sa Tersero distrito sa Bohol. Kahinumdoman nga milansad si Toribio delos Reyes pagka gobernador sa Bohol sa milabay nga piniliay. Gipildi siya ni kasamtangan nga gobernador nga si Edgar Chatto. Sa nakalabay nga piniliay, mikandidato na sab si Toribio delos Reyes isip kongresista sa Tersero distrito sa Bohol. Gipildi siya ni kasamtangan nga kongresista Art Yap nga kanhi Kalihim sa Department of Agriculture. Apan bisan sa sunod-sunod nga kapildihan, wala mawala ang interes ni Toribio delos Reyes sa pagbalik sa paglansad sa mao gihapon nga posisyon.
Buyno, patas ang labanan, matod pa, tungod kay kataposan na man nga termino ni Art Yap og pulos bag-o ang mga kandidato sa maong distrito karong tuig 2019. Daghan ang gihugon-hugon nga makaatbang ni Toribio delos Reyes.
Usa na niini si kasamtangan nga Bise Gob. Dionisio Balite nga mao sab ang tag-iya sa BIT System Schools. Lain sab nga gihugon-hugon nga mokandidato sa mao gihapon nga posisyon mao ang kasamtangan nga mayor sa Candijay, Bohol nga si Mayor Christopher Tutor. Og madayon kining maong mga hugon-hugon, bibo na sab ang piniliay sa tersero distrito.
Sa Segundo Distrito sa Bohol, aduna pay usa ka termino ang kasamtangan nga kongresista sa maong distrito nga si Cong. Aris Aumentado, anak ni kanhi kongresista Erico Aumentado. Sa pagka-karon, wala pay pangalan nga mitumaw nga maoy moatbang kang Aris Aumentado sa maong distrito.