TALK TO PAPA JOE

Nawad-an og paglaum

Dear Papa Joe,

Tawga lang ko sa pangalan nga Luis, 40 anyos, minyo pero gibiyaan sa asawa ug mga anak kay niuban man niya.

Sa una, maayo ang among pagpuyo kay usa ko ka ahente og ilimnon pero karon dako na kaayo ang kausaban sukad nadisgrasya ko. Nadasmagan ko og sakyanan pero disgrasya gyud to kay natumba ang cart nga gikargahan og ilimnon unya paapas pa nako nga di mahuwad maoy pag-agi sa sakyanan ug na out of balance ko. Sa premiro, gigam pa ko sa akong asawa pero nagkadugay magsige na mi og away kay walay kwarta. Niundang na lang gyud ko kay di na man ko kalakaw ug nahurot na akong pabawon sa kompaniya.

Wa ko magdahum na ing ani diay akong mahiaguman labi na karon nga naghinangat ang Pasko. Maora bag haw-ang ang tanan ug maayo na lang gani naa pa akong mga ginikanan ug igsuon nga maoy nag atiman nako. Pero wa ko magpabigat nila kay nitabang ko og negosyo sa pagluto og barbeque pero di gyud malikayan nga mosantop gyud sa akong utok nga lami nalang ihikog kay murag wala may padulngan ang akong kinabuhi. Mag-unsa na lang ko kon matiguwang ko ug wala na akong mga ginikanan. Palihug lamdagi ko nga mawa ni sa akong huna-huna.

LUIS

Luis,

Ang tawo nagbase kasagaran sa makalibutanong aspeto. Kon naa kay kwarta, okay na. Naa kay hitsura, okay na. Pero wala usahay panglantawi ang pagkakontento nato sa espirituhanong aspeto. Kita tanan mamatay ra ug di nato madala atong hitsura ug kadatu sa atong pagkamatay.

Buhata nga instrumento imong kaugalingon sa uban nga susama nimo og kondisyon kay bisan unsa pa ka kakompleto ning kalibutana, duna gyud nay kaatbang nga problema. Ayaw sige og kompara sa mga tawo nga kompleto kay masakitan ra ka. Hunahunaa ang imong purpose ning kalibutana.

PAPA JOE

(sa inyong tampo ipadala lang sa papajoesuperb@ gmail.com)