Asawa ni Marco
Bag-uhay lang nagsugod si Marco pagdrayb og taksi. Usa siya ka mekaniko kaniadto nga minimum lang ang suweldo sa usa ka automotive repair shop. Aminado siya nga medyo kuwang gyud ang iyang kita, ilabi na nga duna na siyay singko anyos nga anak kang Anne, iyang asawa. Si Anne nakabangkilya hinuon sa iyang kita kay nangahente man kinig insurance ug appliances. Mao nga nakahukom siya sa pagpamasada og taksi.
Naglagiting ang kainit sa adlaw karong buntaga dihang may tawo nga mipara sa iyang taksi.
“Asa ato, Sir?” matod ni Marco.
“Bay, sa Ayala lang ko, Bay,” tubag sa tawo.
“Sa Ayala Mall, Sir?” paniguro ni Marco.
“Oo, Bay. Bahalag di kita makasulod sa entrance basta kay naa lang ta sa duol.” “Na, sige, Sir. Sakay na, Sir.” Gipadagan ni Marco ang taksi, apan didto siya mahiagi sa dili kaayo niya kasagaran nga again. Dihang padulong na sila sa dako ug ilado nga hotel, gipahunong siya sa iyang pasahero.
“Ngano man, Sir? Wala pa man ta sa Ayala Mall!” ni Marco nga nahibulong.
“Nahibawo ko. Gusto ka bang mokita og P10,000 karong adlawa?”
“Sir?” malipayong pangutana ni Marco nga naghinam“Aw, Oo kaayo, Sir, uy! Kinsa goy dili. Ngano man diay, Sir?”
“Pwes, hatagan tika,” daling tubag sa pasahero. “Kita ka anang babaye nga blonde og buhok nga nagpula og sinina ug may kaagbay nga lalake? Akoa nang asawa. Hatagan tikag diyes mil pesos. Sundi sila sulod sa hotel ug guniti sa buhok dayon guyora ug dad-a nganhi!” masuk-anong namulong ang pasahero.
Daling mikawas dayon si Marco sa taksi ug misulod dayon sa hotel. Pipila pa lang gani ka gutlo ang nakalabay migawas si Marco nga duna nay giguyod nga babaye nga itom og buhok. Iya kining gisagpa, gipatiran ug gisumbag pa gayud.
“Oh, my God! Nganong imo mang gikulata? Uy, yuna pa gani! Dili man na mao ang akong asawa?” sa pasahero nga natingala.
“Ako nang asawa, Sir! Mikuyog sa iyang kliyente sa insurance sud sa hotel. Akoa na! Guniti usa, kay balikon nako ang imoha! Tua sila karon sa reception counter!”
Ug nagdali nga mibalik si Marco sa sulod sa hotel. (KATAPUSAN)