Melindo nadasig ni Nietes
Masaligon si International Boxing Federation (IBF) light flyweight champion Milan Melindo sa iyang poruhan sa umaabot niyang labing dakong away hilabi na kay ang kauban niyang
world champion nga si Donnie Nietes maoy iyang main sparring partner.
Sa interbyu sa Sun.Star Cebu, igsuong buhatan ning mantalaan, nagkanayon si Melindo nga nakaghatag kaniya og dugang kadasig nga si Nietes, kinsa maoy Filipino longest reigning world champion, maoy kanunay niyang gika- sparring.
Si Melindo mosugal sa iyang titulo batok kang World Boxing Association (WBA) light flyweight Ryoichi Taguchi sa usa ka unification bout karong Disyembre 31 sa OtaCity General Gymnasium sa Tokyo, Japan.
Gipasapbot ni Melindo nga grabe ka importante alang kaniya kining maong away gumikan kay iya gyu’ng pangandoy nga usahon ang tanang world titles sa iyang timbang.
“This is very important for me, this is my dream,” matod ni Melindo, kinsa sakop sa bantugang ALA stable sa Sugbo.
Nagkanayon si ALA head trainer Edito Villamor nga mas masaligon si Melindo ning higayuna kumpara sa miagi niining away sa Japan.
Giangkon ni Villamor nga lisod kini nga away alang kang Melindo apan malaumon siyang mopatigbabaw ra gihapon ang iyang batos.
Si Melindo naggunit og 37-2, 13KOs nga rekord samtang si Taguchi adunay 26-2-2, 12KOs nga baraha.