KD MILUWAS SA WARRIORS
Bryant emusyonal sa pagretiro sa 8 ug 24
Nagpakatap og 36 puntos si Kevin Durant lakip na niini ang nakapadaog nga
jumper sa nahabiling 7.3 segundos sa overtime aron agakon ang Golden State Warriors sa makutas nga kadaugan batok sa host Los Angeles Lakers, 116-114, kagahapon sa National Basketball Association (NBA).
Ang kadaugan nakapahugno sa usa ka seremonyas sa halftime diin giretiro sa Lakers ang duha ka mga numero nga 8 ug 24 nga gigamit ni basketball legend Kobe Bryant.
Ang Warriors, nga ningposte sa ikasiyam nilang sunodsunod nga kadaugan, ningsaka sa 24-6 nga baraha samtang ang Lakers mikanaog sa 10-18 nga baraha.
Ang Warriors nakadawat sab og 17 puntos ig 10 rebounds gikan kang Klay Thompson. Sa himatyong segundos sa
overtime, aduna pa unta’y kahigayunan ang Lakers nga maangkon ang kadaugan apanb nadepensaan ni David West ang itsa ni Lonzo Ball unya naabtan na sa buzzer ang tira ni Brandom Ingram.
Ang Lakers gipangulohan ni Kyle Kuzma pinaagi sa iyang 25 puntos, nidugang og 19 puntos si Ingram samtang niamot og 16 puntos si Ball.
Kini maoy ikalimang higayon nga ningkombati ang Warriors nga wala ang ilang pambatong pointguard nga si Stephen Curry ug ikaupat nga wala si Draymond Green. Si Curry adunay sprained
ankle samtang si Green adunay angol sa iyang abaga.
Ang Lakers ningbangon gikan sa lima ka mga puntos nga biya sa hinapos nga bahin sa regulation period aron pagpugos sa overtime.
Grabe ka hugot ang duwa sa overtime.
BRYANT EMUSYONAL
Sa laing bahin, emusyonal si Bryant dihang gisaka na’g sugod ang iyang duha ka mga jersey aron ibitay sa hingpit sa ibabaw sa Staples Center tapad sa uban pang
basketball legends nga gikan sa Lakers.
Gipangtumbok mao ang 13 ni Wilt Chamberlainm 44 ni Jerry West, 32 ni Magic Johnson, 33 ni Kareem Abdul-Jabbar, 34 ni Shaquille O’Neal, 42 ni James Worthy, 22 ni Elgin Baylor, 25 ni Gail Goodrich ug 52 ni Jamaal Wilkes.
Nagpasabot kini nga ang mga numero nga nagbitay sa ibabaw dili puwedeng magamit sa bisan kinsa nga magduduwa sa Lakers hangtod sa kahangturan.
“It is hard to put into words,” matod ni Bryant.
“Growing up and watching all these great players play and learning so much from them, to now be a part of that wall means everything to me. Legacy is really important in the sense of what we have done is awesome, but what is more important for a legacy is how that affects the next generation.”
Sulod sa 20 ka mga tuig nga nagduwa si Bryant sa Lakers ug wala gyud kini mibalhin og team.