2T LIBRAS NGA BOMBA TOA NA SA TOLEDO CITY

Usa ka libo libras nga gibugaton sa karaang bomba nga nakutkotan sa mga construction worker sa gitukod nga building sa IT park sa barangay Apas sa siyudad sa Sugbo malampuson nga naugkat ug gidala sa open

pit sa Carmen Copper sa siyudad sa Toledo kagahapon sa buntag. Gisugdan ang pagkuha sa

vintage bomb sa construction site mga pasado alas 3 kagahapon sa kaadlawon sa mga sakop sa Explosive Ordnance Disposal (EOD) sa Philippine Army inabagan sa Special Weapons and Tactics (SWAT).

Hingpit nga nakuha ang karaang bomba pagka alas 6 na sa buntag ug ila dayon nga gibyahe paingon sa siyudad sa Toledo aron unta didto pabuthon.

Mga alas 8:30 sa buntag luwas nga naabot ang mga awtoridad sa lugar nga didto pabuthon ang bomba.

Matod ni P/Supt. David Señor, hepe sa Operation branch sa Cebu City Police Office, nga hugot nga seguridad ang ilang gipatuman gani sa wa pa sugdi ang pag-ugkat sa bomba gipabakwit lang una ang mga tenant sa IT park nga duol sa construction site.

Usa usab ka team sa SWAT sa siyudad sa Sugbo ang mikuyog sa mga sakop sa Central Command aron mo- escort sa gikargahan sa karaang bomba.

Apan wa mahinayon ang pagpabuto sa bomba pag-abot sa Carmen Copper sanglit kinahanglan pa ang pagtugot sa Department of Environment and Natural Resources (DENR) 7.

Usa sa mga gimando sa DENR mao ang pagpahibawo sa mga lumolopyo duol sa Carmen Copper nga mo- dispose sila sa karaang bomba aron di malisang ang mga tawo.

“Ang Army EOD kun kanus-a nila pabuthon at least na- transport na, ang problema sa Carmen Copper ang coordination sa compliance sa DENR kay gipacomply sila nga dapat pahibaw-on ang tanang community within the vicinity sa Carmen copper before pabuthon,” matod ni Señor.

Dako ang posibilidad matod ni Señor nga duna pay daghang mga karaang bomba sa IT park nga makaplagan sa umaabot nga mga adlaw.

Ang mga awtoridad nakahupay na gumikan sa kahadlok nga mitumaw nga dala sa

vintage bomb ug ipatan-aw sab kini sa mga eksperto. DI MAG-PANIC

Sa usa ka advisory nga gimantala pinaagi sa facebook

page ni Cebu City Mayor Tomas Osmeña, miingon nga sugdan sa Philippine Army Explosive Ordnance Disposal (EOD) ang pagkuha sa bomba alas 3 sa kadlawon karong adlawa, Miyerkules (kagahapon).

“Prior to this, the surrounding buildings will be evacuated and the streets will be cordoned off. If you live or work in the area, please contact your building management or bosses for details. We have already met with them to coordinate and they will give you instructions directly,” matod pa ni Osmeña.

Mihatag sab siya og tambag sa katawhan ilabina sa mga nagtrabaho ug nahaduol sa IT Park nga

di sila kinahanglan ma-panic.

Samtang gitataw ni Osmeña nga di lang kini unang higayon nga adunay nakita nga bomba gumikan sa WWII diri Sugbo.

“Vintage bombs are still found on a semi-regular basis. Never have any of them exploded unless detonated by another

bomb,” dugang niya. Gitataw sab ni Osmeña nga wa bisan usa ka kaso mahitungod sa bomba nga nakit-an nga nibuto sukad sa tuig 1945 apan wa kini nagpasabot nga di posibleng mobuto ang bomba nga madiskobre.

“We have a lots of bomb here in Cebu almost every year we find bombs, there are many bombs that we don’t even know about because that’s the source of dynamite fishermen where they can get their powder for dynamite fishing,” padayag pa niya.

Mibutyag sab si Osmeña nga adunay posibilidad nga wala sa saktong kondisyon ang maong bomba kay kung kini aktibo mahimo na kining mobuto kung maigo sa backhoe.