Bagyong Vinta di moagi sa Sugbo: Pagasa

Maayo nga panahon ang masinati sa Sugbo sa adlaw sa Pasko bisan kon nakasulod na sa nasod ang bagyong Vinta, sumala sa Philippine Atmospheric, Geophysical and Astronomical Services Administration (Pagasa).

Si Engr. Oscar Tabada, pangu sa Pagasa Visayas, nibutyag nga dili moagi sa Sugbo ang bagyong Vinta sukwahi sa unang pagbanabana sa lihok niini dihang anaa pa kini sa Pacific Ocean, gawas sa Philippine Area of Responsibility.

“So, maayo ang kahimtang sa atong panahon sa Pasko,” dugang niini sa pakighinabi sa Superbalita Cebu.

Apan sa Disyembre 22 ngadto sa 23, masinati sa Sugbo labi na sa habagatang bahin sa lalawigan ang hinay ngadto sa kasarangan nga mga pag-ulan.

Sa Disyembre 24 hangtod sa adlaw sa Pasko, masinati na ang maayong kahimtang sa panahon, dugang ni Tabada.

Kagahapon, nakasud na ang low pressure area (LPA) sa PAR ug nahimong tropical depression ug ginganlan kini og Vinta, ang ika 22 nga bagyo sa nasod.

Sa pagkutlo ning balita, si Vinta katapusan nakit-an nga naa sa gilay-on nga 790 kilometros sidlakan sa Hinatuan, Surigao del Sur.

Nagdala kini sa hangin nga may gikusgon nga 45 ka kilometros matag takna ug pag-unos nga moabot ngadto sa 60 ka kilometros matag oras.

Matod ni Tabada nag-irog ang bagyong Vinta sa 20 ka kilometros matag oras sa westward nga direksyon. Base sa pagbanabana sa Pagasa, si Vinta gipaabot motugpa sa yuta sa Davao Oriental o Surigao del Sur.