P15M nga LPG tanks, ekipo, sakyanan ang gisakmit sa CIDG-7

Gironda sa mga sakop sa Criminal Investigation and Detection Group 7 ang usa ka illegal LPG refilling station sa Mambaling access road, Barangay Mambaling sa syudad sa Sugbo.

Armado ang CIDG-7 ug Department of Energy (DOE) 7 og search warrant nga giluwatan ni Judge Jacinto Fajardo sa Regional Trial Court (RTC) Branch 66 sa syudad sa Talisay batok kang Marc Masangkay nga maoy tag-iya sa LPG refilling station nga way permit gikan sa gobiyerno.

Wa masikop si Masangkay apan gipangsakmit sa kapulisan ang mga LPG tanks nga moabot og 253 ka mga tangke, fuel pumps, cylinder tanks, tank trailers ug ubang mobile containers, mga sakyanan nga gikargahan sa mga LPG tank,, timbangan ug uban pang mga kagamitan sa sulod sa refilling station.

Gibana-bana sa CIDG-7 nga mokabat ngadto sa P15 million ang balor sa ilang nasakmit lakip na ang mga sakyanan ug liquefied petroleum gas.

Matod ni Sr. Insp. Edwin Lacostales nga nakadawat sila og report gikan sa DOE 7 ug mihimo dayon sila og surveillance ug validation ug nasuta nga wa silay permit nga mamaligya sa LPG.

“Nakita ng DOE ito na walang permit. So, ni report sa amin at nagsagawa tayo ng surveillance at validation at na validate natin na talagang wala,” matod ni Lacostales.

Sila ang tig supply sa mga retailer sa butane canister nga gipamaligya sa tibuok Central Visayas.

Wa sa LPG station si Masangkay ug mga pahinante lang ang anaa apan bisan pa niini, ang CIDG7 ug DOE-7 niimbargo sa mga dagkong tangke nga puno sa LPG tanks lakip na ang mga sakyanan nga gisakyan niini.

Dugang ni Lacostales nga kasagaran sa ilang kustomer manawag lang kon pila ang paliton niini ug kuhaon ra sa maong refilling station sa barato nga presyo.

Usa sa mga barangay tanod sa Mambaling nga di magpaila nitug-an sa mga tigbalita nga dugay na nga nag operate ang refilling station apan wa lang nila agda sa pagtuo nga legal kini.

Pipila ka pahinante nga giabangan nga mo- deliver sa mga LPG tanks nakurat nga dunay mga police nga ningbabag kanila nga makagawas sanglit sa ilang nahibaw-an legal ang negosyo sa ilang amo.

Si Romeo nga taga syudad sa Naga nagkanayon nga bagohay pa siya nga sugoon nga mokarga ug mga tangke sa LPG sa maong station ug wala magtuo nga illegal ang negosyo ni Masangkay.

“Natingala nalang mi nga naay pulis kay wala man ko kahibalo nga illegal ning ilang negosyo,” matod ni Romeo.