MANINDA OG PABUTO DAKPON

Mibahad ang hepe sa kapulisan sa dakbayan sa Talisay nga si P/Supt. Jason Villamater nga ilang dakpon kadtong maninda og mga pabuto sa bisan asang dapit sa ilang siyudad ilabi na sa merkado sa Tabunok.

Kini human nga hangtod karon ang kagamhanan sa Talisay way gitumbok nga designated nga fire cracker zone. Si Villamater miingon nga ning pipila nalang ka adlaw sa di pa ang Pasko ug Bag-ong Tuig siya nagtuo nga wa nay tugtan ang siyudad nga makabaligya og mga pabuto.

Matod niya nga sila sa kapulisan ug kabomberohan mag-agad lang sa mga opisyal

sa Talisay kon aduna ba silay dapit nga itumbok nga adto lang mahimong makabaligya og mga pabuto.

Apan ning upat nalang ka adlaw sa di pa ang Pasko siya nagtuo nga wa nay tugtan nga makabaligya sanglit wa man usay nikuhag business permit.

Gumikan niini matod ni Villamater nga kutob sa mga mamaligyag pabuto ila kining sakmiton tungod kay nagpasabot kini nga ilegal ug kuyaw usab sa sunog.

Nagkanayon si Villamater nga pabor siya nga way mga pabuto ang ibaligya sa siyudad sa Talisay tungod kay siya mismo di usab uyon sa mga pabuto.

Hinuon adunay mga pamaagi nga ihulip niini nga mao ang pagsaba-saba sama nalang sa turotot.

Samtang ang Talisay Fire Department nibutyag usab nga uyon silang waa gihapoy esignated nga fire cracker zone.

Apan kon pangayuan silag opinion ilang isugyot nga adto sa Talisay Fish Port tungod kay layo sa mga tawo ug pinuy-anan.

Kahinumdoman ang atubangan nga bahin sa Talisay City Hall maoy gitugtan nga baligyaanan sa milabayng katuigan, apan ning higayona dii na mahimo tungod kay gikoral na sa tag-iya.