Mayor sa Surigao nagpasalamat ni Osmeña

Kinasing-kasing nga mapasalamaton si Mayor Guia Sabanal ngadto kang Mayor Tomas sa hinabang nga ihatag ngadto sa iyang lungsod San Francisco, Surigao del Norte.

Si Sabanal, kauban ang tulo ka Sangguniang Bayan (SB) ug laing opisyal nigahin og panahon aron personal nga makapasalamat kang Osmeña.

Isip usa ka 5th class municipality, si Sabanal nagkanayon nga dako kaayo kini nga tabang sa lugar ang P2 milyones nga hinabang human sila maapektuhi sa linog.

“Ang amo gym was damaged during earthquake. So, portion ra nga part among napaaayo ani. Ang P2 million mao ni ang among gamiton para sa pag improve sa amoang municipal gym”, matod ni Sabanal.

Gibutyag usab ni Sabanal ang kantidad nga magasto aron hingpit nga maayo gym nga mokabat og P5 milyon.

“Because of the excitement of the donation, kay dako gyud kini og tabang,” ang rason ni Sabanal sa pag-anhi sa Sugbo.

Apan di lang P2 milyones ang madawat nga hinabang sa katawhan sa Surigao apil na ang paghatag og ambulance.

Nahisgotan sab ni Sabanal nga wa silay ambulance ug L300 van lang nga sakyanan ang gamiton alang sa pagdala sa mga pasyente padulong sa Davao.

Hilabi nga adunay mga pasyente nga di maka- afford para makaadto sa private hospital.

Ang Davao adunay government hospital diin libre tanan, apan kinahanglan pa biyahion sulod sa pito ka oras.