Diskriminasyon sa SRP

So, ubos sa kamanduan ni Cebu City Mayor Tomas Osmeña dili na gamiton ang South Reclamation Project (SRP) alang sa mga sports events sama sa mga fun run/ marathon, motocross, biking ug uban pa. Actually, una nang naigo ning maong kamanduan sa mayor mao kadtong tinuig nga Milo Marathon niadtong Disyembre 3 kansang naandan nga rota diha unta mapahigayon sa SRP sulod sa pipila na ka katuigan.

Maayo na lang kay nakakita gilayon og laing rota ang mga nagpasiugda bisan pa man og ultima hora na nilang nahibaw-an ang kamanduan.

Ang umaabot nga tinuig usab nga Cebu Marathon nga ipahigayon karong Enero dili na usab nila tugotan.

Si Nagiel Banacia, manager sa SRP, sa interview sa mga tigbalita, mipasabot nga isip usa ka major thoroughfare o agianan sa dakbayan, kinahanglan kuno nga ang maong coastal road dili angay pahigayonan og mga kalihukan nga makaapekto sa dagan sa trapiko nga mao usay makadaot sa atong ekonomiya ug sa industriya sa turismo.

Pero og mao ni rason sa City Hall, nganong ila man laging tugotan ang Ironman sa paggamit sa SRP nga kini man maoy grabi kaayong makamugna og kahuot sa trapiko?

Ang fun run/marathon nga normally ipahigayon sa adlawng Dominggo, mosugod sa kadlawon ug labing dugay mahuman og alas nuebe sa buntag nga wala pa kaayoy mga sakyanan mobiyahi samtang ang Ironman maabtan pa usahay og ala una sa hapon.

Unya nganong sila ra may tugotan? Tungod lang ba kay daghang mga langyaw o mga sikat nga personalidad ang mosalmot sa Ironman hinungdan nga dali ra silang makagamit sa SRP ug ang yanong mga Sugboanong magbubuhis dili na hinuon pagamiton?

Dili ba usa man kini ka dakong diskriminasyon ngadto sa mga Sugboanon, Sir Nagiel Banacia, Sir?