TAMBAGI KO, NOY KULAS

Magpa-annul

Dear Noy Kulas,

Just call me Eph, naa na sa abroad nagtrabaho. Na interested ko pagpatambag nimo aning akong problema karon.

Ulitawo pa ko bisan 36 years old na ko. Karon nakauyab ko og 30 years old nga buwag sa iyang bana. Akong ig agaw ang nagpaila ani niya through Facebook. Angkan siya og duha ka buok. Ang iyang bana wa na magsustento sa mga bata human sila nagkabuwag kay nikuyog sa laing bathala.

Karon nihangyo siya nako nga akong gastuhan ang annulment para magkakami na kay mahimo na man nga kasal. Noy, unsay imong tan aw, maayo kaha ako siyang tabangan? Pila may gastuhon sa annulment? Dugay ba ang process? Salamat, Noy Kulas, sa tubag. EPH

Eph,

Ikaw diay ang iyang pagastuhon sa annulment sa kasal? Daku-daku ang gikinahanglan niana. Kaniadto sa akong nahibaw-an labing minus P140,000 ang package, dala na ang bayad sa psychologist niana. Ambot karon kon pila na kay sa akong pagpangutana kaniadto, lahi-lahi ang rate sa mga abogado. Magdepende ang tanan sa inyong sabot.

Dugay ang process kay sa usa ka kaso nga medyo involved ko, giagi pa og barangay sa kliyente una pa gisaka ngadto sa korte. Hasol kay dunay mga court hearing alang sa mga proseso, labina sa pagsukisukit sa mga saksi alang sa petisyon. Natural nga process mag involve gyud og witness aron mabasehan sa hukom sa huwes.

Ang desisyon sa petisyon moagi pa usab og buhatan sa Solicitor General kay I- contest niya ang hukom. Busa di na madali-dali. Kana maoy imong timbangon og maayo kay usa ra ba ni sa mga rason nganong wa kaayoy magpa-annul sa kasal. Mahal ang gasto, taas pa ang proseso. Pero naa pay imong bantayan.Kon kasado sila sa simbahan, duha ka annulment petition ang imong ipasaka. Ang usa sa civil court samtang ang usa sa marriage tribunal sa simbahan. Mao gihapon ang proseso sa simbahan, taas.

Ila-ilaha unag maayo nang bayhana una ka pa mo- decide motabang ka ba sa iyang annulment. Lisod na kon ikaw ang maghago, lain ang mopupu.