The day of Christmas
Kusog ang kakulba nga akong gibati. Nagtuo gyud ko nga si Roland ang nagteks nako. Apan pagsusi nako sa akong selpon, nasayop diay ko. Di si Roland ang nagpadalag message nako kondi si Michael. Mora kog nahugno samtang nagsandig ko sa headboard sa akong kama. “Gd morning, Loida.” Mao kini ang nabasa ko sa
text message ni Michael. Ang samokang dako, buntag pa gani naghasol na nako! Hilom kong nagyawyaw. Gibalik kog patong sa ibabaw sa pasistor ang akong selpon. Wa ko replayi si Michael. Para nako, nagsamuk-samok lang siya sa akong kinabuhi. Stranger siya sa akong kasingkasing, ingon ani ang pag-isip ko kang Michael.
Si Roland lang ang gipitik sa akong kasingkasing.
Migawas ko sa akong kuwarto human ko maligo sa banyo nga diha ra sab sa sulod sa akong kuwarto. Milargo ko sa among terrace. Nabatyagan ko nga di pa kaayo init ang adlaw nga miigo sa akong lawas. Nag-atubang sa subangan ang among terrace. Two storie ang among balay. Didto sa lawn, nakita ko ang among hardinero nga namisibis sa hardin.
Bugtong kong anak. Dato mi kay kapitan sa barko si Papa ug nagbiyahean sa gawas sa nasod. Samtang chief accountant si Mama sa dakong kumpaniya sa siyudad. Kon buot sabton, haruhay gyud ang akong pagkabutang, ang akong pagka anak, ang akong pagka estudyante. Duna pa gani koy kaugalingong sports car.
Apan unsay kapuslanan aning tanan kon mawala si Roland sa akong kinabuhi? Di ug di gyud ko makalimot niya kay aside nga love gyud nako siya, duna na sab mi umaabot nga anak. Unya gihapuhap ko ang dako ko nang tiyan. Nalantawan ko ang duha ka tiguwang, babaye ug lalaki, lagmit magtiayon sila nga nanaygon sa balay sa among atbang.
Nanimaho na gyung Pasko ang palibot. Bugnaw ang huros sa hangin bisan taas na ang adlaw.
Kalit kong nagkusmod pagkakita sa usa ka lalaki nga naglakaw padulong sa among balay. Nagdala siyag usa ka pungpong sa red roses. Nag-smile siya nako samtang giwara-warahan ko niya sa iyang kamot. Unya gipasulod siya sa among hardinero human kaablihi ang pultahan sa gate. Mibiya ko sa terrace aron sa pag-atubang kang Michael.
(SUMPAYAN)