SIGARILYO, CELLPHONES SA JAIL GISUNOG

SAGAD SA MGA KONTRABANDO GIKAN SA OPERATION SECOND CHANCE

Nangunay mismo si Cebu City Jail Warden Supt. Renante Rubio sa pagguba sa mga cellphone ug pagsunog sa sigarilyo nga mga kontrabando nga nahipos nila nga gisuwayan pagpasulod sa maong prisohan.

Aron masiguro sa mga piniriso ingon man sa publiko nga wa’y recycled nga mahitabo sa mga nakolekta nila nga kontrabando, gipakita ni Rubio sa mga tigbalita nga ilahang gisunog ingon man giguba ang mga nakuha nila nga mga kontrabando.

Matod ni Rubio nga 80 porsyento sa maong kontabando gipanglabay kini gikan sa Operation Second chance nga pasilidad diin mga bata ang gisugo sa paglabay niini.

Samtang ang laing 20 porsyento mao kini ang gisuwayan pagpasulod sa mga bisita sa prisohan.

Dugang ni Rubio nga kasagaran sa mga kontrabando mga sigarilyo diin niabot sa kapin 500 ka mga pakete, 14 ka mga cell phones, chargers ug uban pa.

Subay sa ilang hugot nga seguridad sa maong prisohan, 14 na usab ka mga bisita ang ilan gi- ban aron di na ni makapalusot ingon man makasulod sa maong pasilidad.

Sa ilang nakuha, way bisan usa nga drugas niini.

Karong adlawa ang open house sa CCJ diin gilauman ang pagdagsa sa tawo alang na usab sa paghatag og kahigayonan nga makabisita ang ilang pamilya sa mga piniriso.

Dugang ni Rubio nga wa siya’y tawo nga gipa- break o gipabakasyon aron masiguro nga magpabilin ang seguridad sa maong pasilidad. /