Mga biyahe nahibalik na apan posible magnihit

Human hingpit na nga mahibalik ang biyahe sa bus sa Cebu South Bus Terminal, possible nga magnihit kini karong adlawa hilabi na nga ang mga driver moselebrar usab og pasko sa tagsa-tagsa nila ka mga pamilya.

Mao kini ang gibutyag sa security management head sa CSBT nga si Jonathan “Joy” Tumulak kagahapon.

Bisan og hingpit nga nahibalik ang mga biyahe paingon sa habagatang Sugbo.

Dugang niya nga way problema ang biyahe gikan sa Sugbo paingon sa Dumaguete apan ang Dumaguete paingon sa Dapitan, wala pa higpit nahibalik human ubos pa sa Signal No. 1 ang Zamboanga atol sa pakighinabi niini sa tigbalita kagahapon.

Hinuon, aduna’y mga pasahero nga nibiyahe na paingon sa Dumaguete aron didto navlang maghuwat paingon sa Dapitan, Zamboanga del Norte.

Lakip sa nahibalik na nga biyahe ang paingon sa Bacolod ug Guihulngan, Negros Oriental diin manukad kini sa Tangil Wharf sa lungsod sa Dumanjug.

Kagahapon nidagsa na ang mga pasahero ug nipahimangno si Tumulak sa mga nagplano pa nga mobiyahe karong adlawa nga dili magdala og daghang bagahe nga di kinahanglanon.

Hilabina sa mga butang nga di pwede isulod sa terminal ug sa bus, naglakip sa pabuto, kemikal, hinagiban, pintal ug uban pa.

“Ang amo lang awhag sa katawhan nga kon mouli man gali sila, kanang kutob lang sa ilang mabitbit. Para adtong madala og pabuto among balikon nga bawal ang pagpasulod og pabuto sulod sa terminal,” si Tumulak nagkanayon.

Kagahapon nipasalig usab si Supt. Renato Dugan, hepe sa Regional Police Community Relations Division, nga magdugang sila og pulis sa maong bus terminal dugang sa Special Weapons And Tactics (SWAT).