Eva, bana mikihag libel batok Mabatid
Gisumbalik og reklamo sa singer-negosyante ug sa iyang bana ang ilang kanhi employer nga nipasangil nila nga nangilad sa gipalit nga P2.5 milyones nga townhouse niadtong 2016.
Si Eva Delos Santos ug ang iyang bana nga si Ruben David, nipasaka og reklamong libel sa Cebu City Prosecutors Office nga nag-akusar ni Prisca Niña Mabatid, tag-iya sa Pinoy Care Visa Center, nga nidaot sa ilang reputasyon pinaagi sa live interview sa Facebook ug sa napublikar sa mga pamantalaan niadtong Disyembre 21, 2017.
Ang magtiayon nitumbok nga nasayod nang daan si Mabatid nga naka- loan sa Metrobank ang townhouse sa wala pa kini gibaligya ngadto niya ug niuyon kini nga maoy mopadayon sa nahabilin nga balanse sa mortgage nga P1.9 milyones.
Sila nidugang nga bakak usab ang pasangil ni Mabatid nga gibaligya ngadto sa laing tawo ang townhouse.
“These statements are unfounded and Mabatid know them to be false yet she issued them publicly before the media. An act clearly calculated to bring us into disrepute and to embarrass us in the public eye,” matod ni Eva nga nibasa sa giandam nga press statement.
Si Eva nihilak samtang nagbasa sa ilang pamahayag sa gipatawag nga press conference kagahapon kuyog ang ilang tulo ka mga anak nga sila si Monique, Ana ug James Carlos ug sa ilang duha ka mga lawyer nga sila si Atty. Daniel Francis Arguedo ug Atty. Patrick Gallito.
Si Mabatid unang nidangop sa National Bureau of Investigation sa pagpasaka og reklamong estafa batok sa magtiayon.
Siya nipasangil nga napalit niya ang townhouse gikan sa magtiayong Delos Santos ug nibayad kini og P2.5 milyones niadtong Hunyo 7, 2016.
Matod ni Mabatid nga gipalit niya ang townhouse gikan kang Eva aron tabangan kini tungod kay giingong naglisod kini sa panalapi.
Apan ang magtiayon nisumbalik nga wala na magbayad sa iyang binuwan nga amortization sa banko si Mabatid sukad niadtong Hulyo ning tuiga human kini nila gireklamo og illegal dismissal sa National Labor Relations Commission (NLRC).
Si David kanhi nagtrabaho sa Pinoy Care sud sa usa ka tuig ug pito ka buwan isip speaker ug naghupot sa operations sa Middle East samtang si Eva speaker usab sud sa dul-an usa ka tuig.
Apan niadtong Hulyo 4, 2017, gitaktak sila ni Mabatid sa trabaho.
Sila nagtuo nga nanimawos si Mabatid nila ug ni-pressure nga bakwion ang labor case nga gipasaka batok niya ug sa kompaniya niini.
Apil sa gikiha og libel ang mga editor ug tigbalita sa mga mantalaan apan suma pa ni Arguedo, nagplano sila nga bakwion ang reklamo batok sa mga sakop sa media. /