PILOK GIPUY-AN OG MGA TUNGAW
Pila ka adlaw nimo ilisan ang mga punda sa imong higdaanan?
Kon unsa may tubag nimo, angay nga dili nimo paabton og pipila ka semana.
Usa ka babaye sa China ang nanghubag ang mga tabontabon gumikan sa kapakyas niini pag-ilis sa iyang punda sud sa lima ka tuig.
Sumala sa taho sa The Sun, ang hinungdan sa pagpanghubag sa tabon-tabon sa babaye ang gatosan ka mga tungaw kon tag 10 ka tungaw matag pilok.
Sa unang pagtan-aw, susama sa kaspa lang ang makita sa iyang mga pilok.
Matod sa taho sa World of Buzz ang babaye ginganlan og Xu, taga Hubei, China.
Sa taho sa Mirror News, gipuy-an sa mga tungaw ang mga pilok sa babaye kay sud sa lima ka tuig nga wa niini ilisi ang iyang punda.
Katapusan nailisan ang iyang punda niadto pang 2012.
Nahibaw-an ni Xu ang iyang gihambin human kini nagpakonsulta sa ospital tungod sa tumang kakatol ug pagpamuwa sa iyang mga mata sud na sa nangaging duha ka tuig.
Siya na- diagnose nga may conjunctivitis ug blepharitis kun pagpanghubag sa iyang tabontabon diin nauga na usab ang iyang mga mata ug nagmuta.
Maayo na lang gigamitan sa mga doktor og antibiotic eye drops ang mga mata sa babaye ug nangawa ang mga tungaw sa iyang mga pilok.
Ang mga doktor nagtuo nga ang kondisyon ni Xu resulta sa kakuwang niini og personal hygiene.
Nakatampo usab ang kaminos sa hangin nga mosud sa iyang lawak.
Si Xu naulian human matambali sa mga doktor.
Ang iyang higdaanan ang gisunog aron dili makakatap ang mga tungaw sud sa iyang lawak.