Pasko nga luwas

Maghilak ang tuig nga way mangaangol sa pabuto. Mao na nga kada tuig usab nagkampanya ug nagpahinumdom ang Department of Health (DOH) sa publiko sa kakuyaw sa pabuto. Bisan unsa na lang ang diskarte sa kagamhanan ug mga awtoridad aron maminusan ang gidaghanon sa mga mabuthan. Malampuson tuod sila kay nagkaminos, apan daghan lang gihapon ang angol.

Kabahin na sa atoang kultura ang pagpabuto sa dagkong mga kalihukan, sama sa atong pagsugat sa Pasko ug Bag-ong Tuig. Daghan sab ang nanginabuhi gikan ning mao nga industriya. Sa mga ginikanan, angay huna-hunaon ang dakong risgo sa paggamit og pabuto sa Pasko ug Bag-ong Tuig. Busa, kon naa man niini ang usa ka pamilya, di kini iyano-yano sa pagtugyan ngadto sa mga anak.

Mas maayo usab nga tun-an ang paghupot niini ug unsaon sa pagpabuto. Kana bang kanunay mapanagan-on.

Kon buhaton kini, mas maayong layo sa kabayalan kay daghan na sa mga sunog sa Pasko ug Bag-ong Tuig nga ang nakaingon mao ang pabuto.

Apan kon mahimo, ang mga turotut maoy maayong alternatibo o puli sa pabuto. Inay pabuto, dagkong mga turotut ang gamiton sa pagsugat sa Pasko ug Bag-ong Tuig.

Wa ni bisan usa nga negatibong epekto o kuyaw nga dala ngadto sa mogamit. Di pareho sa pabuto nga kon makaangol, posibleng mokutlo og kinabuhi o kaha magbilin og angol nga sa tibuok kinabuhi mo nang antuson.

Kaanindot man sa Pasko ug Bag-ong Tuig nga ang tanan naa sa maayong panglawas ug kahimtang.

Nganong ibutang man sa risgo ang kaugalingon ug sakop sa pamilya nga mahimo man ang Pasko nga way pabuto?

Mas merry ang Christmas kon ang tanan naa sa sitwasyon nga luwas.