Merry Christmas sa tanan

Inig hagtok sa taknaan karong tungang gabii, ato na usab nga hangpon ug gakson ang adlaw’ng natawhan sa atong Manunubos nga si Hesu Kristo. Ang Pasko nagtimaan sa pagminahalay, paghinigugmaay ug paghinatagay. Matod pa sa kanta ni anhing Michael Jackson nga ‘Give Love on Christmas’.

Ang siyam ka adlaw nga misa de gallo tapuson karong tungang gabii pinaagi sa Misa de Aguinaldo. Kadtong adunay ikasarang nga pamilya mag-andam gyud og mga pagkaon sa ilang lamesa aron saw-an sa matag sakop sa pamilya. Mi-ingon ko nga kadtong maka-afford lang kay daghan man usab sa atong mga kaigsuonan nga dili maka-andam og mga pagkaon gumikan sa kawad-on.

Kining akong gihisgutan praktikal baya kini. Kay kining pag-selebrar sa Pasko mag-depende baya usab kini sa kapasidad sa usa ka tawo o pamilya.

Usahay mopatigbabaw ang materyal nga butang ning pagselebrar sa Pasko. Sama sa mga bata, malipay kon makadawat og regalo gikan sa ilang mga mga ginikanan, mga ninong ug ninang. Unsa may atong ipalit og regalo kon wala kitay kuwarta?

Kanang panaghinigugmaay ug pagminahalay naa na permi kanato. Bisan dili Pasko ato kanang puwedeng ipaabot ngadto sa atong isig-kaingon. Apan ang paghinatagay, materyal nga butang kana. Busa nagkinahanglan usab kini og igong sapi aron makahatag kita ngadto sa uban.

PAHIMANGNO

Ug kay usa sa atong tradisyon niining pagsugat sa Pasko mao man ang pagpabuto bisan gidili na karon, ato lamang hangyuon gihapon ang mga naghupot og mga armas de fuego nga dili gyud magpabuto. Kay sa pagkablit sa gatilyo sa inyong armas posible nga adunay kinabuhi nga makalas. Daghan nang mga kaso nga na-igo sa stray bullet. Hinaot nga dili na kini masubli aron malipayon ang atong pagsugat sa Pasko. Merry Christmas sa tanan.

Kining akong gihisgutan praktikal baya kini. Kay kining pag-selebrar sa Pasko mag-depende baya usab kini sa kapasidad sa usa ka tawo o pamilya.