The day of Christmas
One of the reasons nga gipasagdan ko na lang si Michael sa sigeng pagpamisita nako tungod sa iyang sitwasyon, sa iyang pagka loner. Daghan kog nabasa nga libro bahin sa tawo nga naa kanunay sa kaguol, nga nagtuo nga sa kanunay nagsunud-sunod kaniya ang frustration sa kinabuhi. Kasagaran maghikog, o kaha makabaton og deperensiya sa pangisip.
Di ko gusto nga maingon ani si Michael. Giisip ko siyang igsuon. Nagtuo ko nga sa inanay ug sa ngadto-ngadto makadawat na siya sa reality nga di ko mapugos ang akong kauglingon sa pahigugma niya, nga di mi para sa usag usa.
Gabii sa Pasko. Di ko na maagwanta ang kasakit sa akong tiyan. Naglimbag-limbag ko sa akong kama sulod sa akong kuwarto. Nangayo kog pakitabang kanila ni Mama ug Papa. Gidala dayon ko nila sa ospital.
Pagbagting sa kampana sa duol nga simbahan anang pagka tungang gabii aron pagsangyaw nga natawo na ang anak sa Diyos, miuha sab sa akong atubangan ang anak namo ni Roland nga bag-ong gihimugso sa doktora nga nag-atiman nako. Nagkawil-kawil ang pusod sa bata nga ang duha ka tiil gikuptan sa doktora.
Human kaputli sa pusod ang bata, giputos dayon kini sa lampin ug gipahigda tupad nako. Nakapahiyom ko nga nagtan-aw sa bata nga nagkurug-kurog. Liwat kaayo siya ni Roland labi na ang lamurok nga mga aping.
Dako kaayog smile sila si Mama ug Papa nga nagtanaw sa ilang apo. Unya misulod si Michael. Puwerte niyang lipaya nga mihagwahagwa sa bata.
“Ka-cute bataa. Puyra buyag diay.”
Mikatawag kusog si Michael. Nawala ang gibati kong kakapoy ug kaluya. Nakapahiyom ko nga nagtan-aw kang Michael. Karon ko pa matugkad ang kinasingkasing nga gibati niyang kalipay. Mapahiyumon kaayo siya nga nagpadayon sa paghagwa-hagwa sa bata. Ug ang bata sab, morag nakasabot nga gihagwa siya, nagwarawara sa iyang duha ka kamot.
“Ako ang imong Maninoy. Ang buotan mong Maninoy.”
Nahitukikig katawa sila si Mama ug Papa. Nasuod na sa akong mga ginikanan si Michael. Nakagusto sila si Mama ug Papa kang Michael para nako. Apan nakahibawo sila nga si Roland ang akong gihigugma. “Jesus ang iyang ngalan.” Tubag ko kang Mama ug Papa dihang nangutana sila kon unsa ang ingalan ko sa bata.
(SUMPAYAN)