Kapait sa iyang Pasko
Disyembre 25, adlaw sa Pasko. Kapin na sa duha ka oras nga nagluhod si Tisoy sa gawas sa ilang panimalay karong buntaga. Nangindahay siya nga pasayluon sa iyang asawa ug mga anak ning adlaw mismo sa Pasko. Apan wa siya tagda sa iyang pamilya sukad pa ganiha sa iyang pag-abot.
Samtang padayong nagluhod nahandom niya ang kalagot ug kaligutgot sa iyang pamilya nganha kaniya.
“Kuyog sa imong babaye! Ug dili na ko gusto nga mobalik ka pa dinhi sa atoa!” singhag ni Marife, iyang asawa, nga hilabihang sukoa.
“Kon mopakita pa ikaw dinhi sa among balay, akoy mangunay pagpatay nimo!” bahad ni Fredo, ilang kinamagulangang anak. niadtong batan-on pa kini.
Mao kadtoy katapusang higayon nga nakita ni Tisoy ang iyang asawa ug mga anak. Nalipay si Tisoy nga nakadungog sa bahad sa iyang anak. Gihimo kini niyang katarungan nga mobiya sa iyang pamilya ug moipon sa uyab niyang manikyurista .
“Gihinginlan na ko sa akong asawa, Day Rose,” tug-an ni Tisoy.
“Maayo hinuon, Tisoy, aron sa kanunay ania ka sa akong kiliran,” ni Rose nga malipayon.
Gipahimuslan ni Tisoy ang panahon. Gihimo niyang puhunan ang maayo niyang hitsura. Mao nga padayon niyang harbaton ang mga tsiks nga nakagusto niya. Way kaluoy si Tisoy sa mga pangaliyupo sa iyang asawa nga moundang na sa bisyong pamabaye alang sa upat nila ka anak.
“Wa ka maluoy sa imong mga anak? Unsay anaa sa imong mga babaye nga wa nako? Palihog, Tisoy, undanga na kanang bisyo mo!” ni Marife usa ka higayon niana. Hilabihan ang paghilak sa iyang asawa. Apan tig-a na ang iyang kasingkasing.
“Marife, pasagdi ko sa akong kalingawan. Wa man nako pasagdi ang akong kaakuhan alang sa akong pamilya,” ni Tisoy.
Buy & sell ang negusyo ni Tisoy. Maoy iyang gisaligan aron malipay ang iyang mga babaye. Ug hingpit niyang gisalikway ang iyang katungdanan sa pamilya.
Maayo man gani kay adunay maayong trabaho si Marife sa banko. Solo parent nga gibuhi ni Marife ang iyang pamilya. Mibukal og samot ang kaligutgot sa upat nila ka anak kang Tisoy human molabay ang daghang katuigan nga giundang sa ilang amahan ang pinansyal nga katungdanan.
Apan ang tanan adunay utlanan. Nabangkaruta ang negusyo ni Tisoy, human siya gitakbuyan sa daghang sakit. Ug nanglayas ang iyang mga babaye. Naputol ang paghandom ni Tisoy sa nangagi dihang gitunolan siyag pagkaon sa katabang.
“Day, pasudla ko aron makapangayo kog pasaylo sa akong pamilya,” pangaliyupo ni Tisoy.
“Noy, nanugon si Ma’m nga iya ka na nga gipasaylo tungod sa Pasko. Apan dili siya gusto nga mosulod ka, kay mahadlok siya ug ang iyang mga anak nga matakdan sila nimo,” pasabot sa katabang.
Nahisagmuyo si Tisoy sa iyang nadungog. Ug wa niya malikayi nga nakahangad sa mga karatula nga naglumbay ibabaw sa pulta mayor sa balay nga nagtug-an sa natapos nga mga silid sa kaalam sa iyang upat ka anak. Si Fredo, abogado. Si Jeffrey, civil engineer. Si Gilbert, CPA. Ug si Samuel, piloto. Nahiamguhan karon ni Tisoy ang sakit nga kastigo sa iyang kinabuhi. Wa na siya tagda sa iyang pamilya sa adlaw sa Pasko. Natagamtaman niya karon unsa kapait ang iyang Pasko isip inayran ug sinalikway. (KATAPUSAN)