LABAW PA SA DIYAMANTE

Ang usa ka tawo mahinumdoman sa uban dili lang tungod kay sikat o ilado kini sa katilingban, kondili sa maayong mga butang nga nabuhat niini ngadto sa uban.

Mahimo nga siya gipili sa Ginuo aron magsilbi nga instrumento nga matabangan ang mga nanginahanglan sama sa gibuhat ni Fe Mantuhac Barino.

Siya naila sa pagtabang sa mga kabos labi na sa mga kanhi nagumon sa gidili nga drugas pinaagi sa gitukod sa ilang grupo, ang Surrender to God, usa ka recovery program nga giumol sa Love of God Community, usa ka Charismatic group, nga nagtabang sa mga kanhi adik nga mobangon ug talikdan ang dautang buhat.

Sa pagsaulog sa ika 60 nga kasumaran sa iyang adlaw nga natawhan niadtong Disyembre 7, 2017, tumang kalipay ug kaespesyal ang gibati si Fe, pangu sa Archdiocesan Commission on the Laity.

Sa birthday party nga giandam sa iyang mga pagumangkon sa IC3 Convention Center, dakbayan sa Sugbo, nagkapundok sa usa ka okasyon ang mga sakop sa pamilya ni Fe ug sa iyang bana nga si Lito Barino, mga classmate ug officemates, mga kauban sa buhat ug trabaho.

Ang kasaulogan gisugdan og misa sud sa venue nga gipangulohan ni Cebu Archbishop Jose Palma kauban ang 20 ka mga pari nga nakauban ni Fe sa pagserbisyo sa simbahan.

Sa iyang pakigpulong atubangan sa mga bisita, si Palma nagpasalamat ni Fe sa daghang kaayohan nga gipaambit niini ngadto sa uban labi na sa pagtabang sa mga kanhi nalambigit sa gidili nga drugas.

Ang arsobispo nitandi ni Fe nga mas bililhon pa sa bulawan, pilak ug diyamante sa pagkamanggihatagon ug maluluy-on sa uban.

Daghan usab ang gikilig dihang kalit nigawas si Lito luyo sa stage nga may bitbit nga pungpong sa mga buwak human sa video presentation samtang giduyogan sa kanta nga “You” ni Karen Carpenters.

Ang grupo ni Fe ang nipasiugda sa Grand Marian Procession niadtong Oktubre ning tuiga nga giapilan sa gibanabanang 230,000 ka mga tawo.

Apil sa nitambong sa party ang business partners sa ilang negosyo, Duros Group, nga gikan pa sa mga nasod sa Japan, China ug South Korea, mga lider sa Commission of the Laity, Charismatic Communities, SuGod ug ubang mga higala.

Nakigsaulog usab ang mga sakop sa Kkottongnae Foundation, usa ka Korean charismatic group nga nagtabang sa apektadong mga pamilya sa bagyong Yolanda sa Tacloban.

Kasagaran sa mga bisita kay nagsul-ob og itom ug puti nga mga sinina. /