LAKERS GIUSBAN SA GOLDEN STATE
Mipabaha og 33 puntos si Kevin Durant, midugang og pito ka rebounds, pito ka assists ug upat ka blocks sa dihang mipakgang ang Golden State Warriors sa uwahing rally sa Los Angeles Lakers, 113106, kagahapon alang sa ilang ika-11 nga sunodsunod nga kadaugan. Samtang ang rookie nga si Jordan Bell mitala usab sa iyang unang double-double nga season nga may 20 puntos ug 10 ka rebounds, apil na ang layup niini sa katapusang 2:45 segundos nga gisundan og hansak nga maoy nagwanang sa dalan ngadto sa kadaugan.
Sa pildirong Lakers ang duha rookies nga sila sy Kyle Kuzma (27 puntos) ug Lonzo Ball (24) puntos nga may lima ka triples sa ilang unang pagbisita sa Oracle Arena.
Mao usab kadto ang ikanapulo nga sunodsunod nga daog sa Warriors diha sa ilang korte batok sa Lakers kinsa napildi usab sa Warriors diha sa ilang korte niadtong Lunes sa duwa nga miagi pa og overtime.
Nasigpatan nga si Warriors coach Steve Kerr ug ang iyang kanhi assistant nga si Luke Walton nga mao na karon ang headcoach sa Lakers nga maayo kaayong nagka-istoryahan human sa duwa.
Ang Golden State padayon nga miduwa nga wala ang two-time MVP nga si Stephen Curry.
Nabiyaan og 23 puntos ang Lakers sa third quarter aapn sa final 12 minutes hinayhinay kining mikitkit sa bintaha hangtod nga nakasikit kini, 89-88, 7:43 ang nahabilin sa duwa.
Apan didto ra usab kutob ang nahimo sa Lakers human nagkahugpong og balik ang Warriors.
Didto sa Oklahoma City, mipabuto og tres si Russel Westbrook sa katapusang 1.7 segundos nga maoy nakapadaog sa Thunder, 120-117, batok sa Atlanta Hawks.
Sa kinatibuk-an, si Westbrook mitapos sa duwa nga may 30 puntos, 15 ka assists, samtang midugang usab og 24 sa Carmelo Anthony ug 17 usab gikan kang Paul George alang sa Thunder kinsa mirehistro og lima ka daog sa uwahing unom nila ka duwa gikan sa 12-14 nga standings.
“I think we know now how to close and where we’re going to to close,” matod ni George. “Russ is our leader. ... We knew that we could kind of mess them up with the play that we had, cause some confusion. They backed off and Russ had an easy, open opportunity. Russ is as good as anybody when it’s closing time.”
Gipildi usab sa Denver Nuggets ang Portland TrailBlazers, 102-85, gisungay sa Milwaukee Bucks ang Hornets, 109-104, ug gipatugpa sa Los Angeles Clippers ang Houston Rockets, 128-118.
Gipagtong usab sa Miami Heat ang Dallas Mavericks, 113-101, ug nabaling sa Brooklyn Nets ang Washington Wizards ug gipatapsingan sa Piston ang Knicks, 104-101./