The day of Christmas
Kinsa man say di mahimuot sa reaksiyon ni Michael? Nalingaw gyud kaayo siyang nakighagwa kang Baby Boy.
“You know, Loida, this day of Christmas, I realize nga di ko angay ipamugos ang akong kaugalingon nimo. May anak na mo si Roland. Kamo ang angay sa usag usa to guide your son in the right path of his life. Kinahanglang naa gyud ang father and mother sa pagpasunod niya sa katarong.”
Misamot ang gibati kong kalipay sa akong nadungog. Nakuptan ko ang usa ka kamot ni Michael.
“Salamat, Mike, nga nakasabot ka na. Unta matinuod ang imong giingon nga naa ming duha si Roland, magtambayayong sa papadako sa among anak.”
Nakapanghupaw ko kay wa gyud ko makahibawo kon mobalik pa ba si Roland nako.
“Don’t worry, Loida. If Roland really loves you, I’m sure nga this day of Christmas mobaik siya nimo.”
Nindot kaayog pinahiyoman si Michael. Nagtuo ko nga iya kong gidasig. Miyangu-yango na lang ko.
“Aw, husto ka man sab ana, Mike. Kon para nako si Roland, mahitabo gyud nang imong giingon.
But if not, dawaton ko na lang gyud ang tanan, uy.”
Daghan pa mig giestoryahan si Michael bahin sa future ni Baby Jesus. Unya, mitingog ang iyang selpon. Usa ka tawag. Mipahilayo si Michael nako. Iyang gitubag ang nagtawag. Malipayon si Michael.
Usahay motan-aw siya nako ug sa baby. Di ko madungog ang iyang gisulti kay morag iyang gituyo nga hinayon ang iyang tingog.
“Kining, Loida, mogawas una ko. May sugaton ko diha sa gawas. Mobalik dayon ko.”
Miduol si Michael nako human siya makig-estorya sa nagtawag niya sa selpon. Mikidhat pa siya nako dayon niyang gawas sa kuwarto nga akong nahimutangan.
Gihapuhap kog hinay ang ulo ni Jesus. Cute tuod kaayo siya. Aw, liwat gyud kang Roland kay cute man sab siya. Kanindot unta kon matinuod ang giingon ni Michael nga karong adlaw sa Pasko mobalik si Roland nako. Nakapiyong ko ug nangayo kog pinaskohan sa Diyos, nga kalipay unta uban kang Roland ug sa among anak ang akong bation ning adlaw sa Pasko.
Pagpukwat ko sa akong mga mata, wa ko makatingog kay nagtindog sa akong atubangan sila si Michael ug Roland.
(TAPUSON SUNOD GULA)