Maghiusa pagsulbad

Ang problema sa trapiko dugay nang nasinati sa Metro Cebu, apan ingon sa way nahimo ang lokal nga mga kagamhanan. Ang publiko, labina ang netizens, nagsige og yawyaw sa social media tungod ning mao nga mga kasinatian. Napunting ang kasuko sa publiko sa lungsod sa Minglanilla tungod sa grabeng traffic nga nasinati niadtong miaging Sabado nga nilanat og labing minos 10 ka oras.

Kaniadto, gilat-an usab ang Dakbayan sa Mandaue tungod sa di mabangbang nga kahuot sa trapiko. Bisan ang Siyudad sa Sugbo naproblema sa grabeng traffic sa Banilad-Talamban road.

Hangtod karon, naa lang gihapon kining mao nga mga suliran.

Ang suliran sa trapiko di masulbad kon magbinugtong lang ang usa ka siyudad ug lungsod.

Sama pananglitan, matag kabara sa trapiko sa dakbayan sa Mandaue, mokutay kini sa Cebu City ug Lapu-Lapu.

Sa dihang nabara ang trapiko sa lungsod sa Minglanilla, niabot kini ngadto sa Talisay City ug City of Naga. Kini nagpakita nga gikinahanglan ang koordinasyon tali sa mga LGU kon suliran sa trapiko na ang hisgutan.

Kon nagtinabangay pa unta ang mga LGU sa Talisay ug Minglanilla, hayan di maingon niadto ka daku ang problema sa trapiko niadtong sa Sabado.

Nagpakita kini sa panginahanglan sa hiniusang plano sa trapiko ug pagbansay sa mga traffic enforcer nga klarong kuwang pa sa kasinatian.

Tungod kay paspas nga nagkadako ang Metro Cebu, panahon na nga lingkuran sa mga LGU ang mao nga suliran. Di kini masulbad kon sila mag-iyahay lang.

Kon natuki ang suliran sa baha, kinahanglang maghiusa usab sila sa trapiko kay ang mga karsada, sama sa tinai, sumpay.