Oposisyon mabahin, mapildi
Sigun sa kanunay nakung gipahibawo nga mapildi ang oposisyon sa Cebu City kon di sila magkahiusa. Mao kini ang gipaabut sa Bando Osmeña – Pundok Kauswagan (BOPK).
Gikahadlokan nga mabungkag ang ang oposisyon kon mo-insister gayud si kanhi Mayor Mike Rama nga modagan pag-usab sa pagka-mayor batok kang Mayor Tomas Osmeña. Sumala gud sa mga insider sa partido sa oposisyon nga kanunay kuno nga ipasi-atab sa kanhi mayor nga makig- return bout siya kang Osmeña kay nagtuo siya nga iya na kining mapildi niining umaabut nga piniliay.
Apan unsa may partido nga iyang pasilungan? Barug Team Rama nga way national political party? Mag-independente lang siya kay siguro man nga di siya dad-on sa Partido Demokratikong Pilipino – Lakas ng Bayan (PDP – Laban) tungod lagi sa paghingan ni Presidente Duterte kaniya nga nalambigit sa iligal nga drugas.
Sa laing bahin, akong nasayran nga si Bise Mayor Edgardo Labella maoy ituboy sa PDP-LABAN nga kandidato sa pagka-mayor. Ako nagtuo nga ang mga konsehal ug mga kapitan sa barangay nga mibali na sa partido ni Duterte magpaluyo kang Labella. Kon mao kini ang mahitabo mabahin ang botos sa oposisyon samtang maghayang-hayang lang si Osmeña nga magpaabut sa iyang kadaugan.
Daku kining problema sa liderato sa PDP-Laban ubos kang Presidential Assistant for the Visayas Secretary Michael Dino. Ambut og makumbinsir ba kaha niya si Rama nga modagan og laing pwesto gawas sa pagka-mayor aron adunay kahigayunan nga mailog nila ang Cebu City hall.
Panahon na usab tingali nga moangkon na si Labella nga siya maoy buot modagan sa pagka-mayor aron dili mahinayak ang ilang mga dumadapig sa paghatag sa ilang suporta ngadto kang Rama. Kinahanglang ipadaplin na sa bise mayor kining kaikug sa iya kanhing mayor ug dawaton ang kabubut-on sa iyang partidong PDP-Laban.
Tinuod nga diyutay ra ang nagpabuto niadtong miaging Pasko. Tungod ba kay nahadlok sila sa hulga sa gobiyerno nga silotan kadtong magpabuto og iligal nga gidak-on sa rebentador o ba kaha tungod sa kamahal niini?
Akong isugyot sa mga local government units (LGUs) nga dakpon ug silotan gayud kadtong mga milapas sa lagda ug reglamento kalabut sa firecrackers aron motagam. Kon pasagdan sila, ako magpaabut nga daghan na unyang molapas niining umaabot Bag-ong Tuig.
Sama unya kini sa pagarpar sa gobiyerno sa pagsilot sa mga drayber ug operator sa mga PUJ nga mohunong sa pagpamasahiro apan way nakiha. Mao ni katarungan nga wa silay kahadlok nga mohimog welga sa bisan unsang adlaw nga ilang magustohan. Sama usab sa smoking ban, wa gyud ka makadungog nga dunay nataral sa hukmanan o kaha gipriso tungod sa pagpatakag pagpanabako.