Mauswagon ug bulahang bag-ong tuig!
Duha na lang ka katulog ug manamilit na ang 2017 ug mosalida na ang 2018. Pero sa di pa ko motimbaya, mangumusta una ko sa inyong Pasko.
Nakadawat ba mo sa inyong gipangandoy nga regalo? Nakapanghatag ba mo sa mga nagpaabot nga makadawat?
Sa mga nakahinumdom, daghang salamat kaninyong tanan. Dako’g gikatampo ang mga nadawat aron dako ang ngisi sa mga panagway atol sa paghandom sa pagkatawo sa Manunubos.
○○○ Nakamatikod ko nga nimenos ang pabuto sa niaging Pasko. Ingon kaha usab gihapon niini inig sugat sa bag-ong tuig?
Maayo kon maoy mahitabo aron luwas ang katawhan sa sakit sa lawas ug ang mga kabtangan layo sa sunog ug ubang hitabo. Kilogkilogan ko nga magtanaw sa mga gihimong modelo agig pahinumdom sa posibleng mahitabo kon magpabuto gyud.
Dunay napungkol, nabuta ug uban pa. Mogamit lang tag laing mga butang aron magsaba ug abugon ang mga dautang ispiritu gawas sa pabuto. Niini, posibleng malipayon ang atong pagsugat sa 2018.
○○○
Tuig diay sa Earth Dog ang 2018 sumala sa Chinese calendar. Ang duna ani nga sign kay matinud-anon, manggihatagon, matarong, manggiluy-on, baskog ug matinabangon.
Unsa kahay mga di maayong taras sa Earth Dog? Kanindot kaha kon ang atong mga opisyales sa kagamhanan natawo sa tuig sa Earth Dog. Kabuhong kaha sa madlang pipol ug kamauswagon kaha sa nasud.
Bulahang bag-ong tuig natong tanan!
○○○
Uy! Unsa nang mga pelikula sa Metro Manila Film Festival ang inyong nakita? Ning pagsulat nako, wa pa gyud koy natan-aw bisan usa.
Kini tungod kay wala pa ko makalugar ug may mga mas mahinungdanong butang pa nga giatiman. Sama sa nangagi, plano nakong tan-awon ang tanan kon makaya.
Hinoon, duna koy himoong lista kon unsay unahon, unsay isunod ug unsay ipaulahi. Kini magdepende sa daghang butang nga makapadani ug makapaagni nako.
Unsa katinuod nga medyo hinay kuno ang kita sa mga pelikula mao nga dunay gipangilisan. Abi nakog mao ni gusto sa mga makisine ug dili ang mga indie films nga maoy gipalusot sa komitiba sa niaging tuig.
Unsa gyud kaha diay ang gusto sa mga makisine? Atong tanawon inig kahuman sa festival kon dako o gamay ba ang kita.