My New Year’s Resolution

Mikatawag kusog si Vicky. Puwerte gyud niyang himuota sa akong gisulti. Aw, kinsa man say di mahimuot kon nasuheto lang sa akong pagka babaye? Barkada ko si Vicky. She’s one of my best friend. Nasuheto kaayo siya nako.

“Si Joanna mag-usab? Are you kidding, My friend?”

Mipakibo ko sa akong mga abaga, dayon kong kidhat kang Vicky.

“Why not? Sus, kamo gyud, no, nagtuo na lang gyud nga magpabilin ko sa akong pagka ako? Wa diay koy right nga magbag-o labi na karong New Year?”

“Aw, kon sincere ka anang imong giingon, ipakita sa buhat, not words.”

Miseryuso si Vicky. Miseryuso sab ko. Miinom ko sa pineapple juice sa akong baso. Diha mi sa sulod sa McDonald’s niadtong tungora. Gikan ming nanimba sa Cebu Metropolitan Cathedral. Anhi mi magsimbahan si Vicky every Sunday morning. Bisag gitawag kong salawayong paka girl sa uban, but mahadlukon ko sa Diyos.

Aw, ingon gyud tingali ako ani, magduwa-duwa lang sa mga lalaki. Wa man gud sa akong bokabolaryo nga seryusuhon ang lalaki nga akong gikarelasyon. Nasunod ko tingali ni sa akong iyaan nga gipuy-an ko dinhi sa Cebu. Man hater si Tiya Jenny tungod sa mga frustrations niya sa iyang lovelife. Kadaghan na siya nahigugma, apan ang mga lalaki nga iyang gimahal nakigminyo og laing babaye. Pahilakon lang intawon si Tiya.

Mao ni rason nga nasilag siya sa mga lalaki.

“Ayaw gyud pagsalig sa mga laki, Joanna. Pulos sila bakakon. Pasakitan ka lang nila.”

Sa unang gabii pa lang gani nako sa ilang balay ni Tiya Jenny, iya na kong gimaymayan bahin sa mga lalaki. Taga Bohol ko. Nia ko paeskuwelaha ni Mama, igsuon ni Tiya Jenny, sa Cebu. Maka- afford man sila si Papa ug Mama sa pagpakuha nakog Law course kay dato man mi. Dako mig humayan sa among lugar, duna sab mi lapad nga kalubihan. Duha ra ming magsuon ug ako ang kamagwangan.

Kanunay isulti ni Tiya nako nga di gyud kasaligan ang mga lalaki. Maong nasulod gyud ni sa akong utok. Kay guwapa lagi kuno ko, daghan ang naibog nakong mga lalaki. Aw, sugton ko man sab ang akong nagustohan. Apan lagi, buwagan dayon nako ug ilisan sab dayon nakog laing lalaki.

(SUMPAYAN)