Ang dakpunon

Kundisyon na kaayo ang pamati ni Denis. Nawala na ang kakapoy ug duka nga ingon sa natagak na ang iyang kalimutaw. Bisan ala una pa sa kaadlawon apan ingon sa udtong tutok na ang kadan-ag ang palibot sa iyang pananaw. Nakapahiyom siya dihang mibantang sa atubangan sa PUJ nga iyang gi-drayiban ang bayhon ni Loki, ang dispatser nga iyang gika- share kaganiha sa pagsuyop. Pareho sila si Loki nga misurender human gi-tokhang sa mga pulis. Dungan sila nga mingpirma og panumpa nga mobiya na sa ginadiling drugas. Apan sa iyang kahimtang kaganiha mas palabihon niya nga mobalik paghanggap sa utot sa demonyo kaysa madisgrasya siya. Makaamong pa siya sa kinabuhi sa mga pasahero. Kining shabu man ang dangpanan niya matag drayib magabii. Kon dili na gyud madala’g alam-alam ang iyang mga mata sa mga hamis ug is-is nga mga paa sa mga maanyag nga pasahero, dangop na lang siya sa ilang last option. Labi pa kon wala pa nila makuha ang abangan sa dyip.

APRONIANITO FERRATER MIRAMON Talisay, Santander, Cebu

Gibagdok ni Denis ang iyang gi-drayiban nga dyip sa may PUJ STOP nga himuon nilang terminal basta ingon arong orasa. Bisi kaayo si Loki sa pagpanawag og pasahero dihang may nadunggan si Denis gikan sa babayeng pasahero nga nakapahikurat kaniya.

“Unya na larga, Kuya, ha? Kay naa pa koy dakpon!” matod sa babaye nga nagdali’g kanaog. Naniga ang mga mata ni Denis. Na-bad shot siya. Nangurog ang iyang wait ug ang tanan niyang kaunoran. Gusto siyang mopabulhot pagpadagan sa dyip, apan diha si Loki sa atubangan sa sakyanan. Nagpakarat kini sa iyang tingog samtang nag- pangamay sa mga pasahero.

Gikan sa pikas tampi sa karsada dihay lalake nga maskuladohon og lawas nga nagdali paglabang. Sa pananaw ni Denis nagpaingon kini sa iyang nahimutangan. Ang tuong kamot niini naggunit og selpon ug ingon sa way pupamilok nga mitutok sa iyang direksiyon.

“Asa pa man ka paingon, Brodex?” singgit sa lalake nga kauban sa maskuladohon didto sa atbang.

“Paabot kadyot diha kay dia koy dalakpon diri!” mibalos pagsinggit ang maskuladohon.

Ingon sa wala sa iyang kaugalingon nga gipadagan ni Denis ang dyip. Daw sa molupad kini sa tumang kakusog. Maayong pagka shot ni Loki sa kanal tungod sa paglikay nga dili siya madasmagan.

Diriyot magka dumbolay ang mga sakyanan dihang milahos og padagan si Denis sa dyip bisan pula pa ang kolor sa traffic light. Daling gigukod sa patrol car sa mga pulis ang dyip ni Denis dihang wala kini motuman nga palugaron tungod sa kalapasan niini sa balaod sa trapiko.

“Nadugangan na gyud ang akong Pokemon, Brodex!” matod sa maskuladohong lalake nga mibalik pagtabok paingon sa nagpaabot niyang higala.

“Yes! Nadakpan ra gyud!” nakalukso sa kalipay ang babaye nga mikanaog sa dyip ni Denis kaganiha. “Wow! Si Pickachu!” Dayon gi- save niya kini ngadto sa iyang selpon.

Samtang didto sa unahan naapsan sa patrol car sa mga pulis ang dyip ni Denis. Gipakanaog siya ug gipusasan.

(KATAPUSAN)