Paragliding ania na sa Sugbo
Dunay laing motumaw nga tourist attraction sa lungsod sa Oslob, habagatang bahin sa probinsiya sa Sugbo, sugod sunod tuig ug ning higayona naglambigit kini sa natad sa paugnat sa kusog.
Naagni ko pagsulat niini tungod kay talagsaon alang sa Sugboanon kining maong sports adventure nga maingon nato nga medyo may pagka presyo sab. Buot nakong ipasabot kining pag- introduce sa paragliding ngadto sa mga Sugboanon diin karong Enero 6-7 usa ka soft opening sa maong proyekto nga giulohan og “Paint the Sky” ang pagasiugdahan sa Oslob Cebu Paragliding Development Compan sa barangay Daanlungsod, Oslob.
Gibanabana nga adunay 25-ngadto sa 35 ka mga piloto, 10 niini mga langyaw nga gikan sa Korea, France, Taiwan, Singapore, UK, Canada, Japan, Hong Kong ug US, ang molupad ug wanang-wanang sa kahanginan.
Kon ang parachute adto ka moambak ug manukad sa namanawpanaw nga eroplano, kining paragliding lahi kay kini siya adto ka mo take off sa usa ka hataas nga bukid nga may kimba diin didto ka moambak sakay sa imong glider.
Atong gikahinabi ang nagpasiugda niini niadtong Martes sa usa ka salo-salo nga si Malcolm Vargas, usa ka Amerikanhong paragliding coach nga aduna nay 20 ka mga tuig nga kasinatian niini.
Iyang gipasabot nga dinhi sa nasod, aduna na diay 24 ka sites sa paragliding pero upat ra niini ang aktibo. Karon gusto sa ilang kompanya nga mohimo niini sa Oslob tungod kay sigon sa iyang pagtuon, aduna kini dakong bintaha kon itandi sa uban.
Usa na niini ang direction sa hangin, sa gitas-on sa bukid nga nahimutangan sa take off area, dili lisod ug permi nga adunay mga sakyanan, ug labaw sa tanan ang kooperasyon usab sa mga local officials.
Kaabag ni Vargas ning maong proyekto mao sila si Tito Rendon, usa ka specialist sa engineering ug Manol Dalumpines, naila usab nga specialist sa ecotourism, resorts, hotel management and property.
Gipaabot nga mobutho sa maong kalihukan ang mga sakop sa Philippine Paragliding Hang Gliding Association, Pan Philippine pilots ug international pilots. Kining maong proyekto makahatag ug makamugna usab kini og mga trabaho ug ingon man income sa mga tawo sa palibot.
Atong nasayran nga kining Oslob naila ni tungod sa butanding nga maoy gidagsaan karon sa local ug foreign tourists, ug karon aduna na unya usab silay paragliding.
Giimbitar kita nila ni Malcolm ug Tito nga mosuway niini, pero hangtod karon nagduhaduha ko kay hadlokan ra ba kog ingon ani di sama ni Rick Gabuya sa Cebu Daily News ug Gloreitta Lariosa sa The Freeman nga naghinamhinam nga makasuway gyud.
Hinuon ang mahitabo karong Enero 6-7, dili pa gyud kompetisyon kon dili ang pagpaila lang gyud sa maong sports ngadto sa mga Sugbonaon ug eventually mamahimo na dayon kining sporting event.
Sayod ta nga daghang mga Sugboanong interesado usab niini ug mahimong mokontak sila ni Lucille Dalumpines sa 0942-3861-156 o sa 0956-1380253. Good luck, Malcolm, Tito and company.