KATROPA BATOK ALASKA

Mga duwa karon

4:15 pm- Blackwater batok Rain or Shine

7:00 pm- Talk N’ Text batok Alaska

Dili maayo ang tuig 2017 alang sa Talk N’ Text KaTropa, samot na alang sa Alaska Aces.

Hinuon, labing seguro, magtinguha ang duha ka mga kampo nga tuldokan ang 2017 og kadaugan sa pamasin nga mao kini ang magdugkat aron mohapsay ang ilang kampanya sa sunod tuig.

Ang KaTropa ug Aces magsangka sa main game karong gabii sa Philippine Basketball Association (PBA) Philippine Cup sa Cuneta Astrodome.

Ang duha ka mga kampo parehong nasubhan og kapildihan ning maong komperensiya.

Ang KaTropa nasugamak sa 79-82 nga kapildihan batok sa Rain or Shine Elasto Painters samtang ang Aces nabiktima sa Magnolia Hotshots, 108-95.

Sa miaging season, ang Ka-

Tropa nakakombati man tuod og insakto apan pakyas kini paglangkat og titulo.

Sa ilang bahin, ang Aces nagkaguliyang gyud sa tibuok season.

Sa premiro nilang duwa, ang KaTropa nakamugna og daghang turnovers unya daghan sab sila’g sipyat hinungdan nga napukan sila sa Elasto Painters.

“Ang dami naming misses,” matod sa labing sinaligan sa KaTropa nga si Jayson Castro, ang numero unong pointguard sa tibuok Asya, sa interbyu sa Spin.ph.

Ning maong kombati, si Castro ra ang nakapakita og maayong duwa alang sa KaTropa.

“I think if you look at the whole game, Jayson was making the right decisions, taking the shots that he needed to take, making the passes,” batbat ni TNT coach Nash Racela.

“It just so happened that his teammates weren’t able to convert. We’ll find ways to have better execution next time.”

Sa premirong duwa karon, magsangka ang Blackwater Elite ug Elasto Painters. Ang Elite adunay 0-1 nga rekord samtang ang Elasto Painters naghupot og 1-0 nga baraha.

Sa laing bahin, gipanghubog sa San Miguel Beermen ang Meralco Bolts, 103-97, samtang gipangmakmak sa Phoenix Fuel Masters ang Kia Picanto, 125-102, niadtong Miyerkules.

Sa kadaugan, ang Beermen, nga maoy defending champions, ningsaka sa 2-0 nga rekord ug nakakuha'g bahin sa sayong liderato diin ilang gikauban ang NLEX Road Warriors.

Sa ilang bahin, ang Bolts mingdakin-as sa 1-1 nga rekord.