GSW PADAYON NGA GABANGIS
Padayon ang maayong duwa sa host Golden State Warriors bisa’g wala ang usa sa ilang mga lider nga si Stephen Curry ug ilang gipanglubong og taga liog ang Utah Jazz, 126-101, kagahapon sa National Basketball Association (NBA).
Ang Warriors kalit lang nagbangis human sa sikit nga kombati sa 1st half ug ningsutoy ang opensa niini deretso na sa 25 puntos nga kadaugan.
Unom ka mga magduduwa sa Warriors ang ningmugna og dobleng numero nga puntos pinangulohan ni Kevin Durant, kinsa nagpakatap og 21 puntos.
Si Patrick McCaw nidugang og 18 puntos alang sa Warriors, ning-amot og 15 puntos matag usa sila si Nick Young ug Clay Thompson, nihatag og 14 puntos si Draymond Green samtang nitampo og 10 puntos si Omni Casspi.
Ang Warriors, nga maoy defending champions, hinayhinay na’ng ningpahugot sa ilang paggunit sa overall leadership bitbit ang 28-7 nga rekord samtang ang Jazz nahulog sa 15-21 nga baraha.
Gikan sa 48-47 nga labaw sa halftime, ang Warriors ningsugod sa 3rd quarter pinaagi sa 9-0 run aron inaton ang ilang bintaha sa 57-47.
Human niini, makabungog nga 22-6 run ang gihimo sa Warriors aron paburuton pa sa 90-69 ang ilang labaw ug ning higayuna, tatawng nakasabot na’g sugod ang Jazz nga paingon na sila sa kapildihan.
Sa laing bahin, nagpakatap og iyang season-high nga 24 puntos ang beteranong si Vince Carter aron agakon ang host Sacramento Kings sa makapakurat nga kadaugan batok sa Cleveland Cavaliers, 109-95.
Ang Kings ming-abante sa 12-22 nga baraha samtang ang Cavaliers, nga nasukamod sa ikaduha nilang sunodsunod nga kapildihan, natagak sa 2411 nga rekord.
Ang 40 anyos nga si Carter wala nakapakita og aksyon sa miaging tulo ka mga duwa sa Kings gumikan kay nagpaangol kini sa angol sa iyang gusok.
Sa iyang pagbalik, gihatagan niya ang Cavaliers og nagkadaiyang problema ug daw nabalikan sa iyang kabatan-on ang kanhi Slamdunk King sa NBA.
Ang Cavaliers gipangulohan ni Kevin Love pinaagi sa iyang 23puntos samtang nidugang si LeBron James og triple-double nga 16 puntos, 10 rebounds ug 14 assists.
Sa lain pang mga duwa, ningdaog ang Boston Celtics batok Charlotte Hornets, 10291, Dallas Mavericks batok Indiana Pacers, 98-94, Atlanta Hawks batok Washington Wizards, 11399, Chicago Bulls batok New York Knicks,92-87, Minnesita Timberwolvesbatok Denver Nuggets, 128-125 (OT), New Orleans Pelicans batok Brooklyn Nets, 128- 113,Oklahoma City Thunder batok Toronto Raptors, 124-107, ug Memphis Grizzlies batok LA Lakers, 109-99.