Year of the Dog 2018
Unsay kaugmaon nga nagpaabot kanato ning tuiga? Isip indibiduwal nga nakigbugno sa mga hagit sa pagpakabuhi o ang nasod nga naninguha sa hiniusang kalamboan ug nagkab-ot sa maidlas nga kahusay ug kalinaw labi na sa habagatan sa nasod. Hinuon, ang mga Filipino napamatud-an nga dili mawad-an og paglaum, makanunayon ug malipayon bisan taliwala sa katalagman.
Nag-una sa pagkamalaumon sa mga Pinoy tungod sa iyang hugot nga pagtuo sa Ginoo nga Manunubos sa kalibotan ug ang mga tradisyon nga lumad o impluwensiya gikan sa ubang kanasoran mas mipalig-on kanato. Sama sa atong nakuha gikan sa mga Insek, ang pagpalit og mga lingin nga prutas sa pagsugat sa bag-ong tuig ug pagpasunod sa zodiac signs.
Base sa kalendaryo sa mga Insek, Pebrero 16 ang bag-ong tuig, ang 2018 giila nga usa sa mga Year of the Dog diin nagdala og mensahe sa panahon ug mahimong basihanan sa paglaum sa kadaghanang masa ug mopahaom sa iyang pagpakabuhi subay sa giya sa sinyales sa hayop.
Diha sa atong pagpamalandong, ang iro maoy giila nga labing suod nga hayop sa tawo o agalon ug masunoron o loyal, adunahan man o kabus. Sa mga Insek, ang iro paborable nga hayop. Kon ang iro mosulod sa usa ka balay, kini nagsimbolo og bahandi sa tuig. Ang iro timaan sa proteksiyon ug mohasmag usab sa kaaway.
Ang Tuig sa Iro magdala kaha kanato og kaayohan? Kinahanglan nga ubanan kini nato sa tumang kakugi. Ang suwerte dili moabot kon kini dili kab-uton. Sama sa gisulti ni Hesu Kristo, “Lihok tawo kay tabangan ko ikaw.”
Isip nasod, sumala sa mga taho, maayo ug positibo ang dagan sa atong ekonomiya ug mas milambo pa kini ubos sa administrasyon ni Presidente Rodrigo Duterte taliwala sa daghang pagsaway sa iyang mga pamaagi sa pagdumala sa kagamhanan sa pagsumpo sa korapsiyon, kampanya batok sa gidiling drugas ug uban pa.