Bugnaw nga hunahuna sa tuig 2018

Daghan ang gipangayo apan gamay ra ang gihatag. Nakadungog ko ning maong estorya samtang nagkukabildo mi sa aking agaw Burt sud sa iyang manokan gahapon sa Cogon Pardo, dakbayan sa Sugbo. Matod niya, mao kining mag-ampo ta sa Labaw’ng Makagagahom.

Apil sa mga pag-ampo mao ang mga petisyon sa maayong panglawas ug grasya sa inadkaw’ng panginabuhi. Sa kadaghan sa gipangayo matod niya di yud mahatag sa Ginoo ang tanan. Mao na nga ang uban masulob-on kay gusto yud nga ihatag ang tanan. Sa akong pagtuo gihurot ra ug hatag apan gianam-anam. Wa ibulto. O, lain ang gihatag.

Wa maapil sa imong lista. Kana lang unya’g mata nga nag ginhawa ambot giapil ba nimo na ug pangayo nga mag ginhawa unya magpitok pitok ang imong mata unya’g mata nimo human sa imong pagkatug. Dakong grasya kana nga bisan wa pangayoa apan sa hilom Iyang gihatag. Mao nga ning pagsugod nato sa bag-ong tuig. Di nalang ta mangayo og daghan.

Sigurado ko nga bisan kung di pa ta mangayo nahibalo na siya kung unsay atong gikinahanglan. Ang ato nalang nga tumanon unsa ang Iyang mga gimbut-an. Bahala na ang Diyos unsay iyang gusto. Ang importante nga kita nagtuman sa iyang kabubut-on.

May mga higayon nga di ta ka pugong sa gibati. Masuko. Moinit ang ulo. Kahambaton.

Usahay gani moresulta ug di maayo. Normal lang ni reaction sa mga sitwasyon nga kita masakitan. Usa sab ni sa among nahisgutan nga mahimong bag-ohon ning bagong tuig. Sa aspitong medikal makadaghan na ta makadungog ug negatibong epekto sa atong pagka suko. Ilaha nalang na sa mga eksperto. Ang sayon sabton nga kung kanuna’yng bugnaw ang imong panghunahuna gaan ang imong lawas ug ulo.

Pananglit sa mga panahon nga nagdali ka sa kalit lang wa na molihok ang imong gimanehong sakyanan. O, naa ba ka sulod sa jeep. Normal lang nga mangunot imong agtang ug makapamalikas pa man gani ang uban. Ang pangutana human ka masuko niluag ba ang dagan sa trapiko? Wa yud. Nisamot pa man gani hinuon.