My New Year’s Resolution
Gingisloan ko si Vicky. Nahapak ko siya sa iyang bukton. “Naunsa ka diha, Vicky? Ngano gud tawon nga ingon man ana ang imong tinan-awan nako?”
“Sus, palimud-limod pa gyud na siya?”
Nagpangidhat pa si Vicky nako. Gisigahan ko siya sa akong mga mata apan nagkatawa ko.
“Unsa guy palimud-limod, Vicky? Klaroha gani nang imong hunahuna.”
“Klaro gyud kaayo ang akong hunahuna, Joanna. You know, kon wa ka pay gusto kang Ritchel, di gyud nimo siya sugton. In-love ka niya, no?”
“In-love gud tawon. Wa, uy!” Giyam-iran ko si Vicky. “Na, ikaw lang. Ngil-ad ra bang mamakak kon New Year.”
Nakapanglingo na lang ko. Gihurot kog inom ang akong Nestea.
“Di na ta maghisgot anang Ritchel, uy, Vicky. Ang atong hisgotan kon asa ta manglaag unyang gabii?”
“Aw, as usual, manimba ta. Motambong ta sa Misa sa tungang gabii. But sa di pa ta manimba, manuroy ta.”
“Mao nay akong giingon nimo.”
“Sige. Hapiton tika dinhi sa inyo, ha?”
Mitando ko. Unya nananghid na si Vicky nga mopauli. Ako sab, misulod sa akong kuwarto. Mitan-aw ko sa salida sa TV. Dunay kaugalingong telebisyon ang akong kuwarto. Duna say kaugalingong sound system. Dihang gitak-an na kog tan-aw sa salida, gipawong ko ang TV. Nagpatokar kog mga love song. Paborito nako kining klaseha sa music.
Unya nahunahuna ko si Ritchel. Unsa kahay tinuod kong gibati niya, no? Nganong gisugot ko man tuod siya? Igo na bang rason nga di ko gustong makamatikod si Tiya Jenny nga kanunay ming mag-estorya sa selpon maong gisugot ko siya? Na, karon pa nuon nako kini mahunahuna. Aw, kon matinuod ang gisulti ni Vickey nga na-in-love ko kang Ritchel maong gisugot ko kini, unsa kahay akong buhaton, no?
Ang nangagi kong mga boyfriend bisag akong gisugot apan wa koy love nila. Gusto lang gyud nako silang duwa-duwaan. Aw, parehas sab tingali ani ang akong gibati kang Ritchel, uy. Gisugot ko siya kay gusto ko sab siyang duwa-duwaan.
Wa na ko maghunahuna pa kang Ritchel. Pagka gabii, sa gawas mi nangaon si Vicky. Unya nakatan-aw ko sa lalaki ug babaye nga misulod sa restawran nga among gikan-an ni Vicky. Si Ritchel ang lalaki. Duna siyay kaubang girl.
(SUMPAYAN)