MGA BIDA SA 2017
Ubay-ubay sab nga mga atleta sa Sugbo ang nakahatag og dungog sa Pilipinas sa tuig 2017 apan dili ikalimod nga si Philippine marathon queen Mary Joy Tabal ang misidlak og maayo sa tanan.
Apan dili hapsay nga dalan ang giagian sa lumad nga taga brgy. Guba, dakbayan sa Sugbo una nakab-ot niini ang tumoy sa kalampusan.
Adunay sitwasyon nga nahulga ang tinguha ni Tabal nga makarepresentar sa Pilipinas sa international event dihang miaksyon ang Philippine Athletics Track and Field Association (Patafa) sa iyang partisipasyon sa 29th Southeast Asian (Sea) Games sa Kuala Lumpur, Malaysia niadtong Agusto.
Hinuon, nasulbad ra ang isyu tali sa kampo ni Tabal ug sa PATAFA ug nadayon ang kanhi Southwestern University (SWU) sprinter pagsalmot sa SEAG. Nagbunga ang tanang pag-antos, sakripisyo ug determinasyon ni Tabal dihang nakabira siya og gold medal sa full marathon event sa 2017 SEAG pinaagi sa oras nga 2:48:26.
Gawas niini, mikulit sab og kasaysayan si Tabal dihang iyang naposte ang ikalima niyang sunodsunod nga kampiyunato sa women’s event sa 41st Milo Marathon National Finals niadtong Disyembre 3 dinhi sa Sugbo. Siya lang ang nakabuhat niini.
Emusyonal si Tabal dihang niabot sa finish line sa 41st Milo Marathon gumikan kay mitaliwan man ang iyang amahan sa bisperas sa lumba.
Gawas kang Tabal, kinsa nahimong Olympian niadtong 2016, ang ubang mga atleta sa Sugbo nga mingbida sa 2017 mao ang ALA boxers nga sila si Milan “El Metodico” Melindo ug Donnie “Ahas” Nietes.
Human siya napakyas sa naguna niyang duha ka mga pagsuway alang sa world title, si Melindo (37-2-0,13KOs) nahimo na gyung world champion pinaagi sa impresibong 1st round
knockout nga kadaugan batok kang Akira Yaegashi sa ilang IBF jr. flyweight title bout sa Tikyo, Japan niadtong Mayo 21.
Niadtong lang Septiyembre 16, nadepensaan ni Melindo ang iyang titulo pinaagi sa kontrobersyal nga split decision nga kadaugan batok kang South African Hekkie Budler.
Sa iyang bahin, si Nietes (40-1-4, 22KOs) kausa ra miaway sa miaging tuig diin midaog siya batok kang Thai Komgrich Nantapech (22-5-0, 15KOs) pinaagi sa unanimous decision aron angkunon ang bakanteng IBF flyweight title.
Si Nietes, kinsa maoy Filipino longest reigning world champion, nahimong 3-division world champion ning maong kalampusan.