Ang basketball sa Sugbo sa tuig 2017

Ning hingpit nga pagbiya sa tuig 2017, tugoti nga akong tutokan ug hatagan og balik-lantaw ang natad sa basketball dinhi sa Sugbo.

Kini gumikan kay alang kanako, kining maong tuig dinhi nakulit ug nahulma ang mga maayong marka sa kalambuan sa basketball.

Akong buot ipasabot mao ang pagkamugna sa 1st Governor’ Cup nga gipasiugdahan sa Probinsiya sa Sugbo.

Ang maong torneyo nga gitumong lamang sa mga nagpangidaron og 21-paubos gisalmutan sa kapin 40 ka mga local government unit (LGU) ug maoy nahimong sumsuman sa tibuok probinsiya.

Pinangulohan sa batan-on ug maabtikon nga si Atty. Ramil Abing, chairman sa Cebu Province Sports Commission (CPSC), ang maong lega nga gitumong aron pagdiskobre og mga bag-ong talento, nakakabig usab og atensiyon sa ubang rehiyon.

Ang Minglanilla Archangels maoy unang nakampyon sa maong lega human nila mapukan ang lungsod sa Consolacion sa best-of-three finals atubangan sa mga nagpunsisok nga mga dumadapig sulod sa USC gym.

Dili usab mabintahaan ang ikaduhang pagpahigayon sa Samsam Gullas Cup Inter-cities/ municipalities 20-below tournament nga gisalmutan usab sa tulo ka mga dakbayan ug tulo ka mga lungsod sa unang distrito sa probinsiya sa Sugbo.

Gisunod ug gisugwakan usab sa tagsatagsa ka mga dumadapig sa matag team ang maong kompetisyon nga giintrahan sa mga dakbayan sa Talisay, Naga ug Carcar ug ingon man sa mga kalungsoran sa Minglanilla, San Fernando ug Sibonga. Human sa makutas nga elimination ug semifinals round, ang lungsod sa Fernando, sa unang higayon, maoy mipatugbabaw pinaagi sa pagpukan sa Minglanilla sa ila usab nga finals series.

Ang kadasig gikan sa mga tawo nga nakabig ning duha ka mga torneyo, igo na kaayong makapamatuod nga ang basketball anaa gihapoy luna sa kasingkasing sa mga Sugboanon.

Dakong sukwahi sa pagtuo sa uban nga kini nihupas na. Hinuon dili usab nato ikalimod ang kamatuoran nga mao ang dakong paglubad sa kadasig sa mga tawo sa Cebu Schools Athletic Foundation, Inc. (Cesafi).

Subo nga palandungon nga ang usa sa pinaka prestisyuso ug dugokon nga lega kaniadto karon langawon na ug maihap na lang sa mga tudlo ang manan-aw niini.

Hinaot nga karong tuiga, aduna na untay kausaban nga mapatuman ang mga kadagkuan sa eskuwelahan aron molambo ang pagpadagan sa maong lega.

Ning tuig sa teknolohiya, angay na siguro ihatag ngadto sa mga batan-on ang pagdumala. Kini sugyot lang aron pagsalbar sa Cesafi.