Trak natumba; 1 patay, 5 angol

Usa ang patay ug lima ang nangaangol sa pagkadisgrasya sa usa ka six-wheeler

truck nga nagkarga og feeds sa baboy human matumba sa bukirang barangay sa Malubog sa syudad sa Sugbo pasado alas dos kagahapon sa hapon.

Ang driver sa Isuzu Elf (GKN 434) Virgilio Tolones, lumad nga taga La Castellana sa Probinsya sa Negros Oriental nagkanayon nga padung siya mo deliver og mga feeds sa Malubog.

Ang namatay pag-abot sa Cebu City Medical Center mao si Marvin Caño, taga isla sa Olango, dakbayan sa Lapu-Lapu.

Ang mga nangaangol mao sila si Reynald Caño, 20; Josiefer Decierdo, 33; Alden Inoc, 23; Jovanie Ogang, 21; ug Ginilito Hawom, 24, taga Tabok, siyudad sa Mandaue.

Sigon sa pamahayag ni Tolones nga nagkarga siya 120 ka sakong feeds sa baboy, apan duna siyay gikasugat nga delivery van sa Julie’s bakeshop sa dulhogong bahin sa Barangay Malubog ug kalit lang nga wa na mohawid ang break sa iyang sakyanan.

“Ang akong problema wala mohawid akong brake mao kusog akong dagan. Dulhogon na kaayo ang dalan, ako nalang gitimonan ang sakyanan, kalit lang natumba,” asoy ni Tolones.

Human sa pagka tumba sa truck, mga residente sa lugar ang nagtibangay nga madala ang mga samaran sa tambalanan.

Dugang ni Tolones nga 12 ka tuig na siya nga nagmaneho og agkong sakyanan.

Ang delivery van sa Julies (B1 R885) napiyapi ang luyo nga bahin sa sakyanan sa dihang nadumbol sa Elf nga natumba.

Ang lima nga nangaangol anaa pa sa Cebu City Medical Center nagpaalim sa ilang mga samad sa kalawasan. /

TAMPO NI CHONA C. CARREON ■ NATUMBA: Human mawad-i sa brake kining mao nga trak, kalit kining natumba sa karsada sa Brgy.Malubog, dakbayan sa Sugbo. Usa ka kinabuhi ang nakalas.